SHILLONG: Meghalaya a·dokni je skulrangon chatro chatrirangna bate skigiparang bang·batenga, uandakgipa skulrangko sorkari chipna nangao ga·aknaba gnang ine a·dokni Deputy Chief Minister Prestone Tynsong parakataha.
Tynsong-ni parakatani gitade, skulni gadangrangko sualpiltaianio, je skulrangon chatro chatrirangna bate skigiparang bang·batenga, uandakgipa skulrangko sorkari chipna nanggen.
Iako a·dokni Deputy Chief Minister, Sohra-ni Mawkisyiem-o donggipa St Peter aro St Paul Secondary School-ni bilsi 50 gapaniko manianio, jinmana parakataha.
Skulrangko nambate sualna gita sorkari, dingtangmancha niamrangko ra·gataha ine janapatengon, je skulrangan, 2019-2020 bilsio a·dok aro ma·mongni education policy-rango dongimin niam gita ong·jaenga, uandakgipa skulrangkode chalaina on·jawaha ine Tynsong parakataha.
Tynsong-ni aganani gitade, ia u·iataniko iana skangba skulrangna on·manaha.
Bang·bata skulrangan apsan gadango kamrangko ka·jaenga ine janapatengon, je skulrangan porikkarango chu·sokgipa ong·rongbata, uandakgipa skulrangde sorkarini dakchakanirangko chu·onga gita man·jaenga indiba je skulrangan porikkarango name dakrongja ba name chalaija, uandakgipa skulrangsa sorkarini dakchakanirangko bang·bate man·skaronga ine Deputy Chief Minister parakataha.
Uni gimin name kam ka·enggipa skulrang, sorkarini dakchakanirangko chu·onge man·china gita sorkari, skulrangko gital dake nipiltaina aro sualpiltaina sienga ine Tynsong aganaha.
CM Impact guidebook-ko matnanganirangna talataniko on·angskaengon, ia ki·tapde skulni textbook ong·ja indiba matric porikkana tarisoanio chatro chatrirangko dakchake on·gipa guidebook-san ong·aia ine Deputy Chief Minister parakataha.
Ia ki·tapni bidingo ma·sisretjachina gita ma·a paarangko aro jinmako didiatengon, ia ki·tapko MBOSE-sa tarie ra·chakaha ine Tynsong parakataha.
