Local artist-rang suk ong·gijaniko paraka
TURA: West Garo Hills a·jani Jengjal jolo donggipa Bolbokgre-Wa·tregre songo salgnina ong·atanggipa Me·gong Festival, Sonibar walo, ga·subee matchotangaha.
Ia bon·kamgipa attamo, Bollywood-o git ring·gipa Kanika Kapoor, Prateek Kuhad, a·gilsak gimik mingsinggipa Blue dol aro bon·kamao Yellow Claw, gitrangko ring·e, manderangko an·saoatangbeaha.
Ia apsan attamon Garo Hills-oniba mingsinggipa dolrang, jekai Hoi Hoi Makbil, G-Hills Finest, Crack Gang, Rough Road aro Nokpante dolrang, Kingfisher Stage-o gitrangko ring·e manderangko an·saoatangaha.
Iana skang, Sukrobar Attamoba, dingtang dingtang biaprangoni mingsinggipa singer aro band-rang, jekai Richard Marx, Neeti Mohan, Julian Marley aro Nucleya dolrang, Aski Stage-o gitrangko ring·e manderangko an·saoatangaha aro unattamo a·doktangoniba dingtang dingtang git ring·giparang aro dolrang, jekai Ahaia aro Haystack Ladies dolrangni git ring·anirang baksana CM-MGMP Beat Contest-ko ong·atanichi ia festival-ona re·bagipa manderangko an·saoatangbeaha.
Ia salgnina ong·atanggipa Me·gong Festival-o A·chikrangni bijakrangko song·susaani ‘Great Garo Hills Cook Off’ program baksana Miss & Mister Me·gong-na susaanikoba ong·atangaha.
Kobor on·timgiparangni u·iatani gitade, ia salgnina ong·atanggipa Me·gong Festival-o sak 50,000-na baten manderang re·bae bak ra·angtokaha. Skanggipa salo ia festival-ona re·bagiparang komiahaoba, bon·kamgipa salode manderang namen bang·bataha ine kobor on·timgiparang u·iataha.
Ia Me·gong Festival-o a·dokni Chief Minister Conrad K Sangma, dingtang dingtang Cabinet minister-rang, MLA-rang, MDC-rang aro dingtang dingtang dilgiparangba bak ra·angtokaha.
Indake ong·engon, ia Me·gong Festival-o gitrangko ring·na okamatako man·gipa a·doktangni aro joltangni git ring·giparang aro dingtang dingtang dolrang, ia bilsini Me·gong Festival-ko organize ka·gipa ba ong·atgipa manderangni kamrangna suk ong·gijaniko parakattokaha.
Koborko on·ani gitade, ia festival-ni gnigipa attamo, Aski Stage-o git ring·aniko a·bachengani namen ja·manchakaha aro ia program-o git ring·na okama man·gipa dolrangna minggni dakesan ring·na cholko on·aiaha.
“Chingna ia festival-o git ring·na gita a·bachengode minute 30 somoiko tik ka·ahachim indiba bon·kamaode chingko git minggnikosan ring·china aganaiaha. Unbaksana chingna ia festival-o car pass-koba on·jahani a·sel chinga kilometre-gnimang ong·gipa ramako bostu chile ja·achi re·na nangaha. Beben chingni sokangchengode volunteer-rang, chingni bosturangko de·na dakchakaha indiba re·pilani somoiode chingna dakchakgiparangba dongjani a·sel, indita chel·gipa ramako an·tangtangsa bostu chile re·pilangna nangaha,” ine ia festival-o git ring·gipa doloni saksa, kobor ra·timgiparangna aganaha.
