Raksamgre jolrango Assam-ni napdrana jotton ka·aniko namatchina GSMC didia

TURA: West Garo Hills a·jani Raksamgre Civil Sub-Division-ni ning·o Assam-oni napdrana jotton ka·anirangchi a·dok damgnini gisepo so·sojengjeng ong·anirangko nikna man·engani gimin ia meligrikgijaniko namatna man·na gita Assam sorkari aro ma·mong sorkari baksa ta·raken agangrikanirangko dakchina Garoland State Movement Committee (GSMC) Pedaldoba regional unit-ni chairman Rimjen Ch Sangma, Meghalaya a·dokni Chief Minister Conrad K Sangma-ko didiataha.
Chief Minister-na sedoatgipa chittio Sangma-ni parakatani gitade, Meghalaya a·dokba Assam-ni bak ong·engmiting somoirango, ia jolni simarangko name bak ka·jani a·selan Meghalaya a·dokko 1972 bilsio man·chengaonin ia sima jolrango a·dok damgnini manderang, meligrikna man·jaenga.
Ia jolrango a·dok damgnini manderang meligrikna man·jaengani a·selan namroro silroroanirang dongjaenga aro so·sojengjeng ong·anirangko nikna man·rongenga ine janapatengon, “Brahmaputra chibimani Jinjiram chiringara, Meghalaya a·dokni Garo Hills-na sima ari gita ong·achim indiba da·o ia chiring, salgipengchipakna jitangahani a·sel, Assam a·dokni manderang, Meghalaya a·dok ning·o gama ge·anirangko dake aro songdong a·chae, napdrabana man·aha,” ine GSMC Pedaldoba regional unit-ni chairman parakataha.
Sangma-ni parakatani gitade, songni budepa butchumarang aro songni dilgiparango sing·sandie ra·on, Assam aro Meghalaya a·dokni simarangara, Rongsai Bazar dolong, Sapang Pahar, Mangnakopa, Sildubi aro Jolsimina jolrangan asol simarang ong·achim ine ma·sina man·aha.
“Samson Geography-oba, ia songrangko Meghalaya a·dokni sima ning·o donggipa songrang ong·a ine sea donga aro Jinjiram chiringkoba Meghalaya a·dok ning·o jokgipa inen janapani dongachim. Indiba somoirang re·angani kri ia chiringni rama dingtangroroange, Assam a·dokni manderang, Meghalaya a·dok ning·o napdrabae songdongna aro bagan barirangko dake cha·na man·aha,” ine GSMC Pedaldoba regional unit-ni chairman parakataha.
Rabha Hasong Autonomous Council (RHAC)-ko Assam sorkarini bikote on·ani ja·man simarangko gital dake salna gita survey-rangko a·bachengtaiengaha ine janapatengon, survey-ko ka·anio Pedaldoba, Rongsai, Bolsaldamgre, Balbalgre, Lower Kongrapara, Thakurbilla, aro Garo Hills Autonomous District Council (GHADC)-ni Forest Beat Office-koba RHAC-ni ning·osa ga·akenga ine ma·sina man·aha ine Sangma parakataha.
Indake ong·engon, Meghalaya a·dok ning·o ga·akgipa songrangko Assam-o man·angjana gita aro Assam-ni manderang, Meghalaya a·dok ning·o napdrabana man·jana gita iani bidingo ta·raken Assam sorkari aro ma·mong sorkari baksa agangrikchina GSMC Pedaldoba regional unit, a·dokni Chief Minister Conrad K Sangma-ko didiataha.