SHILLONG: Meghalaya a·dokko Khasi-Jaintiarangna dingtang aro Garorangna dingtang dake bak dakna dabianirang chu·sokgipa ong·gen ine Hill State People’s Democratic Party (HSPDP), ka·dongchakkuenganiko parakataha.
Dingtang a·dokna dabianio somoirang nangkunaba gnang indiba ia dabiani changsaode chu·sokgipa ong·gen ine HSPDP-ni president KP Pangniang, an·tangni ka·dongchakenganiko parakataha.
Pangniang-ni aganani gitade, Khasi-Jaintiarangna dingtang aro Garorangna dingtang a·dokko dabianiara a·dokni gitcham dilgiparang, chong·motan HS Lyngdoh aro Clifford Marak-onin ja·dil su·baaha.
Ia dabianiko a·songni gita bilakbatatna HSPDP, dingtangmancha National Federation of New States (NFNHS) baksaba bakrimaha.
“India a·songni dingtang dingtang biaprango, dingtang a·dokna dabienggipa NFNS, ia jani gisepon New Delhi-ni Jantar Mantar-o jinma tom·bimonganiko ong·ate, dingtang a·dokrangna dabiangkugen,” ine HSPDP-ni president parakataha.
“Dingtang a·dokna chingni dabiani chu·sokgipa ong·na somoirang nangkunaba gnang indiba ia dabiani chu·sokgipa ong·telgen ine chinga bebera·a,” ine Pangniang aganaha.
Ia NFNS-o dingtang Garoland-na dabidilenggipa Garoland State Movement Committee (GSMC)-ba bakrimengachim ine nikna man·a.
