TURA: South Garo Hills a·jani Chokpot Civil Sub-Division-ni ning·o gital rikgipa Sangknigre RCC dolongni pakmako rikanio rong·chunrangko jakkalenga ine Chokpot jolni nangrimgimin NGO-rang matnangatenba, ia pakmako rikanio rong·chunko jakkalaniara mikkangchi kenchakna nanganiko ong·atenga ine parakataha.
NGO-rangni parakatani gitade, iandakgipa dolongni pakmarangko rikanio pangnan bainagipa bosturangkosa jakkalrongachim indiba Sangknigre RCC dolongko rikanio pakmarangna rong·chunrangko jakkalaniara, mikkangchi ia dolongko be·gruatani cholrang ong·engani gimin kenchakna nangani ong·enga.
Ia dolongni pakmarangko rong·chunrangchi rikaniara tangka paisa jakkalsretaniko mesokani ong·enga aro ian manderangna kenchakna nanganiko ra·baenga ineba NGO-rang matnangataha.
Ia Sangknigre RCC dolongara, jolo songdongenggipa manderangni ru·uta somoirangna ka·donge nichakenggipa dolongan ong·achim ine janapatengon, ia dolongko baikamna gita namgipa bosturangchi rikchina NGO-rang didiataha.
Ia dolongni pakmarangko rikanio ta·raken namdapatchina didiatengon, ia pakmako rikanio rong·chunrangchi pal nambata bosturangko jakkalskachinaba NGO-rang dabiangaha.
Ia dabianiko knachakjagenchimode mikkangchiba uamang kamrangko name nirikkiangkugen ineba Chokpot jolni NGO-rang parakataha.
Sangknigre RCC dolongko rikanio rong·chunko jakkalenga ine NGO-rang matnanga
Date:
Share post:
