SHILLONG: Meghalaya a·dokni skotong Shillong songjinmani ramarang nosto ong·roroangengani a·sel, re·ruraenggipa manderang neng·nikanirangko chagrongna nangtokengahani gimin ia ramarangko taridapna gita bakan kamrangko a·bachenggnok ine a·dok sorkari parakataha.
A·dokni Deputy Chief Minister Prestone Tynsong-ni kobor ra·timgiparangna parakatani gitade, Shillong songjinmani ramarangko taridapna gita gong kror 45 tangkarangko sorkari chamanaha aro kamrangko ka·na gita work order-koba on·manaha.
Mongolbar salo, a·dokni Deputy Chief Minister, PWD aro dingtang dingtang department-ni official-rang baksa tom·e chanchirimangani ja·man iako parakataha.
Ia tom·anio, Umiam-oni Shillong-ona rama taridapna sienggipani giminba chanchirimangaha.
Deputy Chief Minister-ni aganani gitade, Umiam-oni Mawlai-ona kingking meter 12 ong·gipa ramarangko taridapna sienga aro ia ramako tarina gita bakan sorkari official-rang, biaprangko niangenba, ja·mano Detailed Project Report (DPR)-ko tarignok.
Indake ong·engon, Umiam Dam-ni sambao gital rikenggipa dolongko matchotna siengaha aro ia dolong gita re·baenggipa bilsini March ja dipetde dal·dalgipa garirangko re·na on·gnok ine Tynsong parakataha.
Adita sal somoirangna skang Umiam Dam-ko taridapna gita dal·dalgipa garirangko ia dolong gita re·na on·jahani gimin Night bus aro truck garirang, Shillong-ona joljol re·na man·na gita ia gital dolongko tariaha.
Koborko on·ani gitade, ia dolongko rikani kamrang da·o matchotaha aro ia dolongona ramakosa da·o tariengaha.
