TURA: East Garo Hills a·jao alu ge·e man·aniko bariatna gita Budbar salo, East Garo Hills a·jani Krishi Vigyan Kendra (KVK), ICAR-Central Potato Research Institute (CPRI) aro ICAR-Indian Agricultural Research Institute (IARI) nangrimenba, game ge·e cha·giparangna dingtangmancha training program-ko ong·atangaha.
Ia training program-ko Megagre songo donggipa EGH-KVK-ni training hall-o ong·atangaha aro ia training program-o kg 5500 ong·gipa dingtang dingtang aluni rokomrangko game ge·e cha·giparangna sualatjolaha.
Ia training program-o East Garo Hills a·jani dingtang dingtang songrango game ge·e cha·giparang gimik sak 100-mangni gita bak ra·angaha aro uamangna alu bitchil aro jo·ong siatani samrangkoba suale on·angaha.
Ia training program-ko ong·atanio, EGH-KVK-ni Head aro Senior Scientist Dr SM Hussain, ICAR-CPRI RS-Shillong-ni Senior Scientist Dr Angel Lyngdoh aro EGH-KVK-ni Horticulture Scientist Dr Trudy Sangma, game ge·e cha·giparangna, alurangko ge·ani bidingo agan-skie aro dake mesokangaha.
