Tangka jakkalsretaniko ED-ni sandirokenggipani bidingo CM ku·watna jechaka

SHILLONG: Garo Hills Autonomous District Council (GHADC)-ni namroro silroroanina chamatgipa tangka paisarangko adita sak manderangni jakkalsretaniko Enforcement Directorate (ED)-ni gita sandirokengon, iani bidingo a·dokni Chief Minister Conrad K Sangma, mamingkoba ku·watna gita jechakaha.
ED-ara jakgitele sandirokna man·gipa bimangsa ong·ani gimin ia kamo sorkari, jak on·paani ba ku·rang on·paani katta dongja aro da·o dipet iani bidingo darangba mamingkoba aganna gita man·kujawa ine Chief Minister parakataha.
GHADC-ni ning·o tangka paisarangko jakkalsreta ine matnanganirangna aganchakaniko on·angengon, iani bidingo da·o ED-ni official-rang sandirokengkuani gimin ua aro sorkariba iani bidingo mamingkoba aganna man·kujawa ine Sangma aganaha.
Ia case-ko a·dok sorkaride sandirokenga ong·ja aro iako a·dok sorkaride sandirokna man·jawa ine janapatengon, ia kamko ED, a·paloni maming jak on·paani grian sandirokangaigen ine Chief Minister parakataha.
Garo Hills Autonomous District Council (GHADC)-ni tangka paisarangko jakkalsretani bidingo Enforcement Directorate Shillong sub-zone-ni official-rang, adita salrangna skangsan, Tura-ni biap dambongaoniko sandirokna a·bachengahachim.
Koborko on·ani gitade, 2015-2016 bilsirango Tribal Area-rango namroro silroroaniko ra·bana gita ma·mong sorkarini GHADC-na chamatgipa gong crore 28.66 tangkarangoni gong crore 1-kode Asanang constituency-na chamatahachim. Ia tangkarangoni baditaba lak tangkarangko jakkalsreta ine matnangako man·ani ja·man ED-ni official-rang, matnanga man·gipa manderang, chong·motan Boston Ch Marak, Ismail Marak, Kubon Sangma aro Nikseng Sangma-ni nokrangoniko am·sandiangaha.
ED-ni official-rang sandirokaniko dakon, Asanang constituency-ni gitcham MDC Ismail Marak-ni ge·etaniko man·e, ia tangkarangoni gong lak 19.8-ni cheque-ko Kubon Sangma-na aro gong lak 25.5-ni cheque-rangko Nikseng Sangma-na on·aha aro ja·mano Kubon Sangma, an·tangna watatgipa chu·gimik tangkarangko okenba, Ismail Marak-na on·aha aro Nikseng Sangma-ba chu·gimik tangkarangko, Ismail Marak-ni jikgipa Pratibha Marak-ni bank account-ona watatskaaha ine ma·sina man·aha.
Iani bidingo ED-ni official-rang, matnanga man·gipa manderangko sing·sandiangkugen aro dingtang dingtang sakkirango sandiangkugen ine u·iataha.