Gital Assembly nokko Speaker niangtaia
SHILLONG: Shillong songjinmani Mawdiangdiang-o rika matchotangenggipa gital Meghalaya Legislative Assembly noko Pre-Christmas program-ko re·baenggipa December-ni 19 tariko ong·atna sienga.
Iani bidingo, Assembly-ni Speaker Thomas A Sangma, Deputy Speaker Limison D Sangma aro dal·dalgipa official-rang, Bristibar salo ia gital rikenggipa Assembly nokona re·angenba, ia Christmas program-na tarisamsoanirangko niangaha.
Ia Pre-Christmas program-ko ong·atanian ia gital Assembly noko, official program-ko ong·atchenganiba ong·gnok.
Ia program-ko ong·atna sienggipani bidingo talataniko on·angengon, gital Assembly noko Pre-Christmas program-ko ong·atna gita uamang, MeECL-ni bijoliko on·na tarisamsoaniko niangaha ine Assembly Speaker Thomas A Sangma, kobor ra·timgiparangna parakataha.
Ia Pre-Christmas program-ko ong·atanio bijolirang sichangna nangjana gita bijoli tarina nangani giminba ua MeECL-ni official-rang baksa chanchirimaha ine Sangma aganaha.
Assembly Speaker-ni parakatani gitade, ia tom·anio uamang, Urban Affairs Department-ni official-rang baksaba chanchirime, dingtang dingtang kamrangna nangenggipa a·arangni bidingo agangrikangaha.
Kamrango an·tangni chu·ongnikaniko parakatengon, High Powered Committee (HPC)-ni tik ka·gimin somoi gitan kamrangko matchotna sienga ine Speaker aganaha.
New Shillong Township (NST)-ni Mawdiangdiang-o rikenggipa gital Meghalaya Legislative Assembly nokko matchotna ra·dodaptaiani dongjawaha aro ia gital Assembly nokko, re·baenggipa 2026 bilsini June jaon matchottelgnok ine re·anggipa Sombar salosan Assembly-ni Speaker parakatahachim.
Ia Assembly-ni main hall-ko re·baenggipa bilsini June jaon matchotna gita nisanko donsomanaha ine janapatengon, ia main hall-ko matchotahaode, Assembly-ni pilak session-rangkon ia gital building-o ong·atna man·gnok ine Speaker parakataha.
Bristibar salo, gital Assembly nokko nipilna gita tom·aniko ong·atanio, Meghalaya Legislative Assembly-ni Commissioner & Secretary Andrew Simons, Secretary Malthus S Sangma, Assembly-ni gipin official-rang, MeECL aro Urban Affairs department-ni official-rangba dongpae bak ra·angaha.
