TURA: West Garo Hills a·jani Demdema C&RD Block ning·o donggipa mitam village employment council (VEC)-rango, niam gri job card man·giparang batroroenga ine West Garo Hills Bharatiya Janata Party (BJP)-ni general secretary Peterjob A Sangma parakatenba, iani bidingo sandirokatchina, Union Rural Development Minister Shivraj Singh Chauhan-na sedoataha.
Iani bidingo adita salrangna skangsan, Confederation of Meghalaya Social Organisations (CoMSO)-ni gitaba badi ka·doangaha aro uni ja·man District Administration, sandirokchina ge·etaniko on·angahachim. Indake ong·genchimoba, da·onan ia inquiry-ni report-ko jinmanade parakskakujaenga.
“West Garo Hills a·jani Demdema C&RD Block ning·o donggipa mitam VEC-rango, niam gri job card man·giparang batroroengoba a·dok sorkari, da·onan maming ja·kurangko de·kujaengani gimin anga iachi nang·na u·iatskana nangnikaha. Iandake job card-rangko niam gri man·aniara namen jajrengchakna nangani ong·a aro iani bidingo ta·raken sandirokna nangenga,” ine Sangma, Union Minister-ba badi ka·e sedoatgipa chittio parakataha.
Ia Block ning·o VEC-ni job card-na biming segatanio rang·san tang·dodataniara, niam gri job card-ko on·ani cholrang donga ine mesokaniba ong·enga. Iandake job card-rangko niam gri on·aniara, MGNREGA-ni ning·o man·na nanggipa manderangni pal, niam gri biming segatgiparangnasa on·ani cholrang donga,” ine BJP West Garo Hills-ni general secretary parakataha.
Iandake niam gri job card-rangko man·giparang batroroenganiara, kamko nirokanio olgrokaniko mesokaniba ong·a ine janapatskaengon, iani bidingo jakgitelgipa agency-chi sandirokatchina gita Sangma didiataha.
Mikkangchi iandake niam gri job card on·aniko champengna gita rakgipa niamrangko ra·gatchinaba BJP-ni dilgipa didiataha.
