SHILLONG: Shillong songjinmani Old Pasteur Institute-o gital kuligipa Shillong Medical College-ona Sukrobar salo, a·dokni Chief Minister Conrad K Sangma re·angenba, ia college-ni skanggipa batch-o poraienggipa chatro chatrirang aro ia college-o kam ka·enggipa manderangko grongeaha.
Shillong Medical College-ni chatro chatrirangko aro kam ka·giparangko grongeanio a·dokni Chief Minister baksana Health Minister Wailadmiki Shylla aro Health department-ni official-rangba dongpaaha.
Shillong Medical College-o a·dokni Chief Minister, chatro chatrirangna aro medical official-rangna aganprakengon, ia medical college-ara Meghalaya a·dokna namen nangchongmotgipa college ong·a ine parakataha.
“Ia medical college-ko anga, Prime Minister-ni kuliatna ka·dongengachim indiba uni kulie on·aniko an·ching senge dongengon, anga ia college-o kam ka·giparang aro chatro chatrirangko grongna sikani gimin da·alni bako ia college-ona re·baaha,” ine Sangma aganaha.
Shillong medical college-ko kulianio a·dokna namen neng·beani kam ong·aha ine janapatengon, ia college-ko bimang ong·atna gita rakbee kamko ka·ahani gimin ua dingtangmancha, a·dokni gitcham Health Minister Ampareen Lyngdoh aro Health Department-ni official-rangko mittelpilangaha.
“An·chingni re·mikkanganio an·ching bang·en neng·nikanirangko chagrongna nangkuengoba chinga chingni ku·rachakanirangko chu·sokatna kamko ka·gen,” ine Chief Minister aganaha.
Ia medical college-o kam ka·na gita an·tangtangko on·kange re·bagipa doctor-rangkoba Chief Minister mittelpilangaha.
Shillong Medical College-ni skanggipa batch ine gisik ra·na siengani gimin ian skanggipa batch-ni chatro chatrirangna namen gisik ra·beani somoi ong·gen ine janapatengon, “Na·simangan, mikkangchi ia college-o poraiangna sienggipa chatro chatrirangna namgipa bimingko donangna nanggen aro iako chinga na·simangoniko ka·dongenga. Kamko a·bachenga changantian ra·bianirangde dongaia indiba anga na·simangna iako ku·rachakenga, chinga na·simangna nanga gita dakchakanirangko on·aigen,” ine Chief Minister, ku·rachakaniko on·angaha.
