SHILLONG : Batanggimin somoio me·chik bi·sa saksa baksa phone ka·e agangrikgipa kattarang, social media-o giprorogipani bidingo matnangako man·gipa South West Garo Hills-ni ning·o ga·akgipa 11-Boldamgre-ni MDC Stevi Marak-ni kosako bichal ka·china gita saksa social activist dabiaha.
MDC-ni daka kamrangara Protection of Children from Sexual Offences Act, 2012 (POCSO)-ni ning·o ga·aka. Koborko man·ani gitade, saksa Mingran T Sangma ia a·selni bidingo Tura Women Police Station-o FI on·aha, je case ba mamlaan da·o atura ong·e dongenga ine social activist Greneth Sangma aganaha.
Indake ong·engon ia case-ko de·biltaichina State Commission for Protection of Child Rights, Meghalaya, Shillong-ni Chairperson-ko mol·molan baksana FIR on·gipani bidingo kam ka·anirang maidake ong·enga, matnangako man·gipa mandeni kosako ja·ku de·ama de·kujama aro de·kujaenga ong·ode mai a·selni gimin ru·utatengachim, iarangni bidingoba Greneth Sangma, SCPCR-ni talataniko nangnike bi·aha.
POCSO Act, 2012 ian bi·sarangni kosako ong·gija dakaoniko chel·chakna dingtangmancha ra·gatgimin niam ong·a, uni gimin dosi donggipani kosako ia niamon ga·chate bichal ka·na nanga ine ua aganaha.
Unigimin ia case-ko bikotpil·enba dosi dakgipani kosako POCSO Act, aro ugita nangchapgipa niamrangko pangchake bichal ka·china gitba social activist, SCPCR-ko mol·molaha.
