SHILLONG: East Jaintia Hills a·jao niam gri chalaienggipa damsni koela so·ani karkanarangko pe·e galani ja·man East Jaintia Hills a·jao niam gri chalaienggipa dam 16 karkanarangoni dam 11-kode chipatna man·aha ine East Jaintia Hills a·jani Deputy Commissioner Shivansh Awasthi parakataha.
East Jaintia Hills DC-ni u·iatani gitade, samtangtangko chel·chakna dongimin niamrangko aro kacharini ge·etanirangko manigija niam gri chalaienggipa coke plant ba koela so·ani karkana damsniko, Meghalaya State Pollution Control Board (MPSCB) aro Police official-rang, apsan am·sandienba pe·e galna man·aha.
East Jaintia Hills a·jao niam gri chalaienggipa dam 11 koela karkanarangoni damsnikode sorkari official-rang pe·e galaha aro gipin dambrikoba nokgiparang an·tangtangan pe·e galaha ine Awasthi parakataha.
Deputy Commissioner-ni u·iatani gitade, East Jaintia Hills a·jao chalaianggipa koela karkanarangoni dam 16-kode niam grisa chalaienga ine ma·sina man·aha aro iana skangba dambonga karkanarangko pe·e galaha.
Bangki dam 11 koela karkanarangkoba, niamo chalaina man·na gita permission-rangko ra·chengchina re·anggipa October jaon u·iatahachim indiba ia karkanarangoni maming aganchakanirangko man·sojahani gimin December-ni 13 tariko, MSPCB aro Police department, apsan re·angenba, ia dam 11 karkanarangoni damsniko pe·e galaha,” ine Awasthi parakataha.
Ia dam 16 koela karkanarangko, sorkarini u·iatgimin gita maming niamrangko ja·rikgijasa chalaiengachim aro Sonibar salo damsni karkanarangko pe·e galna man·ahani gimin da·o dam 11 karkanarangko chipattokna man·aha ine Deputy Commissioner parakataha.
