SONGSAK: Meghalaya a·doko Opposition dolko dilgipa aro Trinamool Congress (TMC)-ni MLA Dr Mukul Sangma-ni dilanichi, East Garo Hills a·jani Songsak Constituency-o TMC-ko bilakbatatna ja·ku de·chakataha ine u·iataha.
Koborko on·ani gitade, Songsak constituency-o TMC-ko bilakbatatna gita Sonibar salo, chadambe dolni tom·aniko Tasek-o ong·atangaha aro ia tom·anio, dingtangmancha gital dilgiparangkoba seokangjolaha.
Ia tom·anio TMC-ni chadambe dolko dilna gita seoka man·gipa manderangara, president-na Dilsrang N Marak, vice president-na Krainthi B Marak, general secretary-na Chuangseng Ch Marak aro joint secretary-na Bryan A Sangma ong·a.
Ia tom·anio Songsak-ni MLA Dr Mukul Sangma-ba bak ra·e, chadambe dolni gital dilgiparangna agan-ku·pattianirangko on·angaha aro mikkangchi TMC-ko bilakbatatna gita ku·rachakaniko on·angaha.
