SHILLONG: Meghalaya a·dokni deficit skulrango skigiparangna Dearness Allowance (DA)-ko, sorkario kam ka·giparang gitan 51 percent-ona bariatchina aro uamangni man·na nangkuenggipa arrear-rangko watatchina gita Khasi Jaintia Deficit School Teachers Association (KJDSTA), a·dok sorkario dabiangaha.
Sombar salo, KJDSTA-ni membor-rang, Shillong songjinmani Malki kal·chakramo tom·aniko ong·atangenba, skigiparangni DA-ko bariatchina a·dok sorkario dabiangaha.
Iani bidingo, a·dokni Chief Minister Conrad K Sangma-na sedoatengon, deficit skulrango skigiparangna, ru·uta bilsirangonin DA-ko 43 percent dake on·kuengani a·sel skigiparang, tangka paisani gita neng·nikanirangko chagrongna nangenga ine KJDSTA-ni president Boswell S Pala parakataha.
“Uni gimin sorkario kam ka·enggiparang gitan deficit skulrango skigiparangnaba DA-ko 51 percent ka·e on·china aro batanggimin somoirango bariatgipa DA-ni arrear-rangko ta·raken on·china chinga sorkariko didienga,” ine Pala, Chief Minister-na sedoatgipa chittio parakataha.
Ia dabianiko re·baenggipa 2026 bilsini January 15 tarikni gisepon chu·sokatchina dabiangengon, on·gimin somoi gita ia dabianiko chu·sokatgenchimode, skigiparang jingjengatanirangko dakna draatako man·gen ine KJDSTA-ni president mikrakataniko on·angaha.
Indake ong·engon, deficit skulrango skigiparangna Centralized Provident Fund (CPF) system-ko ra·gatchina, kamoni neng·takgimin skigiparangna Death-cum-Retirement Gratuity (DCRG)-ko on·china aro sesretani grigipa MEGH-SIMS portal-ko ra·gate on·china gitaba KJDSTA, a·dokni Chief Minister-ko didiataha.
Adita salrangna skangsan Meghalaya sorkario kam ka·enggiparangna DA-ko 2 percent-chi bariatenba, 2025 bilsini July 1 tarik dipetde DA-ko 51 percent dakatahachim.
Indake ong·genchimoba, deficit skulrango skigiparang, da·onan DA-ko 43 percent dake man·skakuengani gimin uamangnaba apsan daken DA-ko 51 percent-ona bariatchina sorkario dabiangaha.
