TURA: Tura-oni Dalu-ona tariangenggipa National Highway (NH-217) ramako matchotaha ine lekkarango National Highways & Infrastructure Development Corporation Limited (NHIDCL)-ni parakataniko Niksamso Garo Community Organisation (NGCO) jegalatenba, ia ramako bilsi bonga batpiloba matchotchipkujaenga ine parakataha.
NGCO-ni parakatani gitade, Tura-oni Dalu-ona dakanggipa ramako re·ange mikrontangchi nie ra·egenchimode, ia ramani bang·bata bakrangon matchotgija donaniko, maming retaining wall donggijako aro rama gimikon ramani prakanirangko nikna man·enga.
“Ia ramako bilsi bonga batpilani ja·manba matchotchipkujaenga indiba ia ramako NHIDCL lekkarango matchotaha ine jinmana parakataha. Iandake parakataniara, biapo ong·enga baksade namen dingtanggrika,” ine NGCO-ni dilgiparang parakataha.
Ia ramani bang·bata bakrangon, ramani naptomani aro retaining wall-rang donggijaniara, salanti re·ruraenggipa manderangna namen kenchakna nanganiko ong·atenga ine janapatengon, “Ramani bang·bata biaprangkon matchotkujani a·sel a·dimurara dake songre songgabatgiparang, mongsongbate scooty, bike dakgipa garirango songregiparang neng·nikanirangko chagrongna nangtokenga. Iani bidingo chatro chatrirang aro salanti re·ruragipa manderang changni chang badi ka·doahachim indiba uamangni badi ka·anirangko contractor-rang knachakjaha,” ine NGCO parakataha.
Indake ong·engon, Tura-oni Dalu-ona NH-217 ramako jakgitele sandirokchina, kam name ka·gijagipa contractor-rangni kosako rakgipa dairangko ra·china, kamrangko nirokjringe, somoi gita kamko matchotatchina aro tangka paisa jakkalsretgipa company-rangko Garo Hills-o iandakgipa kamrangko ka·na on·jachina NGCO dabiangaha.
