TURA: Tura-o ICFAI University Meghalaya-ni Management Department, re·anggipa July 15 tarikoni 17 tarikona, ‘Digital Disruption in Marketing: Challenges, Opportunities and Sustainability’-ni bidingo salgittamna National Seminar-ko ong·atangaha aro ia seminar-o a·songni dingtang dingtang biaprangoni skigiparang, research dakgiparang, karkana chalaigiparang, bading chiwalgiparang aro chatro chatrirang, re·bae bak ra·angtokaha.
Ia National Seminar-ko IUP Publications baksa nangrime ong·ataha aro ia seminar-o Meghalaya, Assam, Manipur, Mizoram, West Bengal, Odisha, Uttar Pradesh, Jharkhand, Uttarakhand, Madhya Pradesh, Maharashtra, Andhra Pradesh, aro Sikkim a·dokrangoniba re·bae bak ra·angtokaha.
Ia seminar-ko ICFAI University-ni saksa professor Dr Brenda D Marak, convenor ong·e dilaha aro ia seminar-ko ICFAI University-ni Vice Chancellor Dr Alicia Gatphoh-ni dilanichi ong·ataha.
Ia national seminar-ko ong·atanio, Madhya Pradesh a·doko donggipa Vikrant University-ni Vice Chancellor Prof Atul Kumar, ICFAI University Meghalaya-ni Director Proley M Sangma, Digital Marketing aro AI Coach Amudhakar PR aro dingtang dingtang skigiparangba dongpae bak ra·angtokaha.
