SHILLONG: National People’s Party (NPP)-ni dilanichi a·dok sorkari aro Garo Hills Autonomous District Council (GHADC)-oba bang·en namroro silroroaniko ra·bana man·aha ine Mongolbar salo, a·dokni Cabinet Minister aro NPP-ni MLA Timothy D Shira a·kangatenba, re·baenggipa 2026 bilsio ong·atna sienggipa GHADC election-ko NPP chegopaigen ine an·tangni ka·dongchakenganiko parakataha.
Shira-ni aganani gitade, a·dok sorkari aro GHADC-ko chalaienggipa NPP, batanggimin somoirango GHADC-ni dingtang dingtang neng·nikanirangko namatna man·ahani gimin ia chang GHADC election-oba NPP chu·sokgipa ong·taigen ine ua ka·dongenga.
GHADC-o kam ka·enggipa manderang, ja 42-mang ong·pile dormaharangko man·jae neng·nikanirangko man·engmiting somoio NPP-chi dilenggipa sorkarisa, dakchakaniko on·e kam ka·enggipa manderangni neng·nikanirangko namatna man·aha ineba Shira a·kangataha.
“A·dokni Chief Minister, an·tangni u·i-ma·sianichi aro dilna changanichi, GHADC-o kam ka·enggiparangna changsanon ja 12-ni dormaharangko on·na man·aha. Re·baenggipa jarangoba GHADC-o kam ka·giparangna ua jaantian dormaharangko on·na ku·rachakaha,” ine NPP Minister aganaha.
Opposition dolrangni matnanganirangko jegalatengon, matnanganide politics-ni bakan ong·aia aro pangnan sorkariko chalaienggipa party-ni kamko jegalna jotton ka·rongaia ine Shira aganaha. Indake ong·genchimoba, NPP-chi dilenggipa sorkarini on·gilanirangko aro kamrangko manderang namen ma·sia ine Shira aganaha.
“Nama kamko chu·sokatoba matnanganide dongaia. Ian opposition dolrangni kam ong·a indiba manderangde, sorkarini kamrangko nikenga,” ine ua aganaha.
GHADC election-na skang an·tangni ka·dongchakenganiko parakatengon, NPP-na ua maming ra·bianirangko niksamsoa dongja aro GHADC-o Executive Council-ko rikpiltaina ka·dongenga ine NPP-ni dilgipa aro Resubelpara-ni MLA parakataha.
