SHILLONG: Jal Jeevan Mission (JJM)-ni bangki dongkuenggipa tangka paisarangko India sorkari, re·baenggipa 2026 bilsini January jao watatna ka·dongenga ine Budbar salo, a·dokni Public Health Engineering (PHE) Minister Marcuise N Marak parakataha.
Iani bidingo kobor ra·timgiparangna talataniko on·angengon, dingtang dingtang a·dokrango, JJM-ni kamrangko matchotatna man·kujaengani a·sel ma·mong sorkari, tangka paisarangko watatkujaenga ine Marak parakataha.
Re·anggipa Sombar salo, a·song gimikni chief engineer-rang, New Delhi-o tom·aniko ong·atangenba, iani bidingo chanchirimangaha ineba Marak aganaha.
“India sorkari, JJM-ni tangkarangko ta·raken, haida January jani gisepon watatnaba gnang ine a·dokni chief minister angna talate on·aha. Tangka paisarangko watatna skang, mitam a·dokrangko, JJM-ni kamrango neng·nikanirangko namatchina ge·etaha,” ine PHE Minister aganaha.
Meghalaya a·doko JJM-ni kamrangko maming dongnuani grian name chu·sokatenga ineba ua a·kangataha.
“Meghalaya a·doko chinga JJM-ni 83 percent-na baten kamrangko matchotmanaha. Badiaba badiaba biaprangon chonchongipa neng·nikanirang dongkuenga aro ia neng·nikanirangko namatengaha,” ine Minister aganenba, gipin a·dokrangode Meghalaya a·dokna baten dal·dalgipa neng·nikanirangko man·enga ine parakataha.
Meghalaya a·doko kror 700-na batgipa bill-rangko gamna tarimanaha ineba Marak parakataha.
“Ia bill-rangko MIS gita online-o gatataha aro da·o third party inspection-ba matchotahani gimin tangka paisarangko watatahaon, ia bill-rangko gamtokgnok,” ine PHE Minister aganaha.
A·dokni badiaba badiaba biaprango JJM-ni kamrangko name chu·sokatja ine matnangenggipani bidingo janapatengon, mingsa minggni project-rango adita sak contractor-rangni kosako sorkari, ja·kuko de·na nangkuenga ine Marak aganaha.
