TURA: Meghalaya Nationalist Congress Party (NCP), Sukrobar salo GHADC election-o susanagipa sakbonga candidate-rangni list-ko parakaha. Mikkang bilsi 2026-o ong·atnasienggipa election-na political dolrang namen tarisoengjok.
NCP, candidate-rangni list-ko bak dake parakatenga. Sukrobar salo Dachi Lake-o party-ni president Omilo K Sangma-ni dilanio ong·atanggipa NCP State Election Committee tom·anio candidate-rangni bimingko parakataha.
Tom·anio aganprakataon party-ni president, party-ni agenda-ko parakangaha.
“NPP, Garo Hills-o songdongenggipa manderangna dangdike on·na miksonga, indiba na·simang dakchaka gride chinga chu·sokna amjawa, uni gimin na·simangni dakchakaniko nanga. GHADC-ni obostako pilakan u·ia. Batanggimin ru·uta bilsirangonin District Council-na dingtang Electoral Roll-ko dabienga. Minggipinara Garo Customary Law ong·a. Bilsi 1952-o GHADC-ko a·bachengaha, bilsi 74 ong·engjok da·onaba tarian dongkuja. CEMs aro MDC, unbaksana a·dok sorkarini dakchakaniko nanga, A·chik Chief Minister dongomangba, uamang District Council-ni ia minggni nangchongmotgipa mamlarangko chu·sokatna man·jaenga ine Sangma aganaha.
Uni gimin ia matchotgija dongenggipa mamlako chu·sokatna NCP-ni president, Garo Hills-ni pilak manderangko a·dokni namgnina kam ka·anio bakrimna ku·mongaha.
Uandake NCP ticket-o chakatnasienggipa party-ni parakatgipa candidate-rangara- Nikjrang A Sangma (Silkigre), Menthu M Marak (Babelapara), Matgrik K Sangma (Jengjal), Jison D Marak (Boldamgre Constituency) aro Babulal N Marak (Gasuapara)- iamang ong·a. Party, GHADC-ni gimik constituency-rangon chakatgen ineba u·iatangaha.
