AMPATI: South West Garo Hills (SWGH), Ampati-oni Uttora Sangma, District Selection Committee (DSC)-ni memborrangko dingtang dingtang kamrangna manderangko rakkianio mikkang nitea ja·ku de·a ine matnangaha.
DSC-o DC- Chairman, ADC- secretary, political-ni gita rakkigipa Vice Chairman aro sakgni gipinrang donga, uamangan Laboratory Assistant-ni post-na subject -ni expert donggija candidate-rangko interview ra·aha.
Lab Assistants-ni post-na sakgittam manderangko kamo rakkiaha. Ua sakgittam politics-ni dakchakanio rakkigiparang ong·a ine matnangaha.
Niamni gita, gipin post-rangna recruitment-o DSC, appointing authority-oni expert-ko interview-na okama.
Apsan niamni Para 2.5.4-o appointing authority, kragipa expert-ko seoka. Para 2.5.1-o DSC nangnikode Adviser-koba seokna bil donga.
“Kamo rakkigipa sakgittam candidate-rango experience dongja, jeoni saksade St. Claret School-o assistant teacher-ni kamko ka·gipa ong·a. DSC, kraa gita personal interview-ko ra·jaenga. Laboratory Assistant-ni post-na viva voice-ko ong·tao subject-ni expert dongja. Interview-ni somoio CCTV footage-ko on ka·ama ka·ja ukoba talja ine Uttora aganaha.
Subject expert donggijan marks-ko on·aha. Interview-ni result aro marks kragipan ong·srangja. Interview-o man·rikgijagipa candidate-ni suk ong·gijagipa ma·a-paarang, interview-ni marks-ko u·ina sika. Advertisement-o HSSLC candidate-rang ia kamna apply ka·na man·gen ine aganaha. Experience donggipa candidate-rang, ad-hoc basis-o kam ka·giparang aro nambatgipa qualification donggiparangkon ra·jaha.
“DSC-ni memborrangko bilsi 7-8-na seokaha, da·onaba uamangni term bon·kujaenga. Sorkarini policy-o skia poraia donggipa chadamberangko kamo rakkina miksongode, experience aro degree donggijagipa memborrangko appoint ka·aniara ong·ama? Ian kamna tikkelenggipa chadamberangna kragipa cholko on·na ong·janisa ong·enga.”
Uni gimin sorkari, DSC-na politics-oni seokgipa memborrangko nirokna nanga, basakobade, uamang chadamberangna kamko on·na ka·dongate tangkakoba ra·a ine matnangaha.
“DSC-ni Chairman, political-ni gita seokgipa memborrangni gualanirangko nirok-simsakna nangachim, maina uamang niamrangko u·igiparang ong·a. Ia degree chu·onggija manderang IAS officer ba MCS officer-rangko kamo rakkina dilangna kraama? ine sing·doaha.
Iarangni gisepon Uttora, DSC-o candidate-rangko kamo rakkianio kragipa niamrangko ja·rikenga, iako talna gita RTI file ka·angen ine aganaha.
