Shillong: Bilsi 20 ong·pilgipa Mahatma Gandhi National Rural Employment Guarantee Scheme (MGNREGS)-ko Viksit Bharat Guarantee for Rozgar and Ajeevika Mission (Gramin) (VB-G RAMG)-chi bodolskana ma·mong sorkarini chanchiako namnikjae Sukrobar salo Shillong-o Meghalaya Pradesh Congress Committee (MPCC)-ni memborrang BJP state office mikkango jingjengataha.
Jingjengatao Congress worker-rang, a·songni songadam-nokadamrango janggi tangenggipa million-ni million nokdangrangna dakchakgipa scheme-ko bon·atna miksongani gimin BJP-ni dilenggipa NDA sorkariko matnangaha.
Kobor ra·timgiparang baksa agangrikmitingo MPCC-ni general secretary Manuel Badwar, indine aganaha, “Meghalaya-oni noksik-nokbako dongenggipa songni manderangna chinga bilake u·iatanirangko gipatna miksonganio jingjengatenga. Scheme-ko bodolataon maidakgipa obostarang ong·gen, iani gimin u·iatna nangnika.
Ian, India-ni Constitution-ni on·gipa fundamental right-ko chadrapani ong·a. MGNREGS-ko bon·ate gital framework-ko ra·baaniara a·songni gimik bakrango dongenggipa songni manderangna janggi tangna cholko on·enggipa kamko bon·atgen ine agane Badwar, ma·mong sorkarini scheme-ko bodolna chanchiako raken jegalaha.
Minggipin ian rural employment-ko politics-ona ra·angskagen, jeni a·sel jinma manderangsan neng·nikako chagrongna nanggen. Je nokdangrangan guaranteed employment-o pangchake donga, uamangde maiko ka·e janggi tanggen. Uandake Meghalaya-o bang·a nokdangrang rural employment scheme-o pangchaka. Uni gimin ia janggi tangani cholko bon·ata ong·ode bang·a nokdangrangan detangtangko school-rangko ra·galna nanggnok, aro salantio janggi tangna bilongen neng·nikaniko man·gen ine MPCC dilgipa aganaha.
BJP, iandakgipa dingtanganiko ra·bana miksongachi Congress-ni kosako politics kal·engasan ong·aija indiba Mahatma Gandhi, jean MGNREGS-ko be·en pilatna didianiko on·aha, uni kosako chadrapani ong·a.
“Niatgenchimode gipin a·dokrangna bate Meghalaya economically bilgribatgipa ong·a, uni gimin Employment guarantee-ko nangchongmota. Batanggimin bilsi 20 somoirangonin million-ni million manderang MGNEREGS-chi bang·en dakchakaniko man·enga ine War aganaha.
Minggipin Covid 19 sajinma sokani somoio MGNREGS, hajira kam ka·e cha·giparangna bilongen dakchakaha ineba War agankuaha.
