TURA: Gittamgipa Mangsang Rice Festival 2025, Sonibar salo namen matchotangaha. Jekon East Garo Hills-ni Mangsang-o December 18 aro 19 tariko salgnina ong·atangaha.
GSU Mangsang Regional Unit, East Garo Hills, Mangsang jolo man·gipa dingtangmanchagipa mirongni gimin manderangna u·iatna aro ge·a-gamaniko namdapatna miksonganio ia festival-ko ong·ataha. Mangsang jolo dingtang rokomni mirongko man·a ine mingsingbea, baring rong (purple) ni mirong namen cha·tobegipa ong·a, jekon Food Safety and Standards Authority of India (FSSAI) certified ka·aha.
Festival-o East Garo Hills-ni Additional Deputy Commissioner Diana G. Sangma, Rongjeng C&RD Block-ni BDO Ruby Balkame R. Sangma aro Rongjeng Civil Sub-Division-ni Assistant Commissioner Kyntu Shullai- uamang gipinrang baksa festival-o bakko ra·angaha.
Uandake festival-ni gisepo dingtang dingtang program aro kal·susaanirangko ong·atangjolaha. Jekai joltango kal·gipa kal·anirang, buyer and seller meet, git ring·susaa-chroksusaa, aro Fashion Show- ba uandakgiparang ong·atangaha. Jeon joloni aro gipin songoni manderangba bakko ra·angatokaha.
Atamo concert-koba ong·ataha, jeon jolni artist-rang jekai Rikram Mrong, Jitupan Bora, Lemarson Marak, Slipper on My Foot aro Martin-mang bakko ra·ange festival-o bak ra·giparangko an·sengataha.
