Tura: Niksamo Garo Community Organization (NGCO) Rajabala Unit, West Garo Hills Rajabala-o ATM machine ru·uta somoirangoni kam ka·jaengani gimin suk ong·jae bank authorities aro administration-ko ia mamlako nirokatchina mol·molaha.
“Batanggimin adita jarangonin badi ka·omangba da·onan ATM-ko tarichipgija donenga. Jeni a·sel jolni manderang tangka bikotna neng·nikko man·tokenga. Da·oni gita somoio Christmas bilsi gitalni somoirang sepangbaengon manderang baditan koros ka·na gita nanga, iandakgipa somoio tangka bikotna ATM-ona re·angon ATM-na kam ka·ja, uni gimin manderang neng·nikako chagrongenga ine CSO aganaha.
Rajabala songadam ong·ani gimin jolni manderang salantini kamrangna ATM-o pangchaka. Buchuma-budeparang, student-rang, hajira kam ka·e cha·giparang, aro chonchongipa bading-chiwale cha·giparang tangka bikotna gita ATM-o pangchaktoka. Bank autorities, iako nirokatjaenga ine janape NGCO, bank authorities aro administration-ko ia mamlako ta·raken nirokatchina mol·molaha.
