HNLC dol baksa agangrikna do·ga oe donengkua
SHILLONG: Adita salrangna skang, East Jaintia Hills a·jani Shymplong songo Dhar Construction Company-ni bagano Improvised Explosive Device (IED) bomako gopretanina a·dokni Deputy Chief Minister Sniawbhalang Dhar jegalatenba, bobil dolrangni iandakgipa kamrangna sorkari bame on·jawa ine parakataha.
“Iandakgipa kamrangko chinga sorkarini gita nie dongjawa. HNLC dolara champengatako man·gipa dolsa ong·a ine chinga ma·sia aro iandakgipa kamrangko chinga raken jegala. Ia a·sel ong·ani ja·man police-rang ta·raken ja·kuko de·aha aro adita sak manderangko rim·na man·aha. Chinga bebera·a, police-rang aino pangchake kamrangko ka·angaigen,” ine Dhar, kobor ra·timgiparangna aganaha.
Tangka dabiani bidingo HNLC bobil dolni dilgiparang, dingtang dingtang dake aganenga ineba Dhar matnangataha.
“Uamang (HNLC) an·tangtangan dingtang dingtang dake aganenga. Adita jarangna skangsan Sniawbhalang Dhar, bobil dolna tangkarangko on·e dakchakenga ine aganaha aro da·ode uamang, tangka gamjaenga ine aganskaenga. Uni gimin uamangni matnanganirangara maming pangchakani grigiparangsan ong·aia,” ine Deputy Chief Minister aganaha.
A·doko bobil dake chakataniko sorkari bon·atna aro warachakna rakbee kamko ka·enga ine janapatengon, bobil dolrangni iandakgipa kamrangna kenjachina gita Dhar, a·dokni manderangko didiataha.
“Bobil dolrang darangnaba chinga bame on·jawa ine chinga chadamberangna aro a·dokni pilak manderangna u·iatna nangnikenga. Chinga iandakgipa kamrangni kosako chakatgipa ong·a aro sorkari, na·simang baksa ong·engani gimin a·dokni manderang pilakkon kenjachina chinga didienga,” ine Dhar aganaha.
Bobil dolrangko tom·tomaona re·bachina sorkari nangnikenga ine janapatengon, HNLC bobil dolkoba sorkari baksa agangrikaniona re·bapiltaichina Deputy Chief Minister didiataha.
“HNLC baksa agangrikna chinga do·gako oe donkuiaenga. Uamang Home Minister-ni gadango agangrikna re·baahachim aro da·alonan chinga do·gako oe donkuaienga. Chinga a·dokna bon·changgijagipa tom·tomanikosa nangnikenga,” ine Dhar aganaha.
