TURA: Garo Hills Autonomous District Council (GHADC)-ni gitcham MDC-rangna pension-ko on·anio mitamrangnasan mikkang nitee on·aha indiba mitamrangde on·jaha ine gitcham MDC-rangoni mitamrang matnangataha.
Gitcham MDC-rangoni saksa, Balachanda-ni gitcham MDC Sofior Rahman-ni parakatani gitade, GHADC-ni ning·o sak 300-na baten gitcham MDC-rang donga indiba da·o dipet sak 35-mangni gita gitcham MDC-rangsan pension-rangko man·sotokengkua.
“Gitcham MDC-rangna pension-rangko watataha ine kobor man·soe chinga namen kusi ong·aha indiba ia pension-ko Ex-MDCs Welfare Association-ni membor-rangnasan on·enga ine chinga koborko man·soaha. Pension-kode Garo Hills Autonomous District Council (Members’ Pension) Act, 2007-ni niamrango pangchakesa gitcham MDC-rangna on·ani ong·a aro darangnaba mikkang niteani dongna nangja indide maini gimin welfare association-ni membor-rangnasan ia pension-ko on·skaenga,” ine gitcham MDC-rangoni mitamrang sing·doataha.
Gitcham MDC-rangni parakatani gitade, gitcham MDC-rang pilaknan chu·gimik pension bill-rangko GHADC-ni Legislative Department tariahachim indiba Welfare Association-ni dilgiparangsa, ia list-ko den·galpilenba gital list-ko taripiltaichina didiahani gimin gitcham MDC pilakni man·na nanggipa gong 4,97,35,374-oni gong 2,54,15,456-kosan sanction ka·ataiaha.
“Iani a·selan gitcham MDC-rangoni mitamrangde pension-ko on·anio watchanggalako man·tokaha,” ine gitcham MDC-rangoni mitamrang parakataha.
Gitcham MDC-rangoni bang·batan Kristianrangsa ong·e Krismasko manipagiparang ong·a ine janapatengon, gitcham MDC-rang pilaknan ia pension-ni tangkarangko sokatchina gita gitcham MDC Sofior Rahman, a·dok sorkariko didiataha.
