WILLIAMNAGAR: Dingtang dingtang biaprangoni, East Garo Hills a·jani Williamnagar-o donggipa SP office-ona re·baenggipa manderangna neng·takna gita East Garo Hills a·jani SP Stephen A Rynjah-ni dilanichi, dingtangmancha ‘Neng·takram’ biapko kulie on·aha aro ia biapko Robibar salo, a·dokni Cabinet Minister aro Williamnagar-ni MLA Marcuise N Marak-ni jakchi, kulie on·angaha.
Ia ‘Neng·takram’ biap baksana apsan salon, Williamnagar Police-ni tarigipa Krismas light-rangkoba a·bachengataha.
Ia ‘Neng·takram’ biap aro Krismasna tarigipa light-rangko a·bachengate on·anganio a·dokni Cabinet Minister Marcuise N Marak, jinmana aganprakangengon, dingtang dingtang biaprangoni re·baenggipa manderangna ia neng·takram biapko aro Krismasna light-rangko taridilahani gimin East Garo Hills a·jani SP Stephen A Rynjah aro uni dolko mittelpilangaha.
Manderangna tom·tomani, ka·dongani aro meli nangrimani baksa chel·chakaniko on·na gita an·tangtangko on·kange kamrangko ka·engani giminba Marak, East Garo Hills a·jani police-rangko mittelpilangaha.
Ia ‘Neng·takram’ biapko kuliani bidingo East Garo Hills a·jani SP Stephen Rynjah, jinmana talataniko on·angengon, chel·a biaprangoni SP office-ona re·baenggipa manderang, neng·takani biaprang dongjae bang·bata somoirangon, ramasamrangosa asonge neng·takna gita nangrongani gimin police department, iandakgipa manderangna ia neng·takramko rike on·na tik ka·aha ine parakataha. SP office-ona re·baenggipa manderangsan ong·aigija ia biapo, jeba neng·takna gita man·aigen ineba SP aganaha.
Ia ‘Neng·takram’ biap aro Krismas light-rangko a·bachengate on·anganio, Deputy Inspector General of Police (DIG) Western Range JFK Marak aro dingtang dingtang official-rangba dongpae bak ra·angaha.
