NEHU Tura Campus-ni Student Body Pro VC-na chakpaenganiko paraka.

TURA: Tura, North Eastern Hills University-ni Pro Vice-Chancellor Professor Fameline R. Marak-ko kamtangoni watchina dabianiko, NEHU Campus-ni chatro chatrirang raken jegalatskae una chakpaaniko on·nengon, ru·uta salrangonin University-ko chalaienganio simsakgijani a·sel bang·a neng·nikanirangko chagrongna nangenganiko namatna man·kujaengani  bidingo  matnangskaangaha.
Indake, Post Graduate Student’s Union (PGSU) aro Garo Student’s Union (GSU) NEHU Tura Campus Cell , student community-rangni kobor-na u·iatani gitade, Professor Fameline R. Marak-ko  North Eastern Hills University, Tura-ni Pro Vice-Chancellor-na  seokaniko dakahanio, niamni gita aro dingtang dingtang gadangrangni  ra·chakanirangko man·ne Pro VC-ni gadangna kragipa ong·e uko seokaniko dakaha ine talataniko on·atangenba, Marak-ko  NEHU Act 1973-ni ning·o pangchake,  2025 bilsini re·anggipa May-o  NEHU Executive Council-rangni ra·chakaniko man·ne seokaniko dakaha ine u·iataha.
Indake, Tura Campus-o sakgni mangmang pangkamgipa officer-rangchi chalaiengon, bang·bata kamrangko ka·enggiparangan contractual staff-rangsa ong·a, aro Prof. Marak-ni dilenganio dingtang dingtang neng·nikanirangko namatpilna gita neng·ragipa ong·ja ine parakaha. Una agreba, Professor-ni kamtangoni watanichi ru·uta bilsirangna man·enggipa  neng·nikanirangko namatna gita man·jawa indiba ian Campus-ni chatro chatrirangnasa nengnikaniko rabaani ongaigen  ine parakatengon, “ Chinga Pro Vice-Chancellor-ko kamtangoni wataniko nangnikja aro iako ong·na gita on·jawa,” ine aganaha.
Tura Campus-ko battanggimin bilsi bri ong·na sipile, Pro VC aro student body gri chalaiaha ine talatangenba,  ia obostarangna NEHU Vice-Chancellor Prof. Prabha Shankar Shukla-ni  kosako matnangatenba, niamrangko ja·rikgija dakanichi institution-ko bilgrigipa ong·atangan baksana Vice-Chancellor, Campus Director-kosa songaha, iarangchi student-rangni skie raaniko aro campus-ko chalaianiko nosto ong·atani  aro student body-rangni bilko bon·atsrangani ong·a ine aganaha.
Una agreba Prof. VC-ni ia ja·ku de·aniko maming jaja·ani gri ian niamko pe·e dilsretanisa ong·a ine parakatenba, iani bidingo battanggimin salrango NEHU-ni gita ku·cholsan ong·e, Vice-Chancellor-ni kosako  jegalanirangko dake dabianirangko dakangahanikoba giisk ra·atangjolaha.
Uni gisepon, battanggimin salrango Vice-Chancellor-ni dilsretahaniko raken jegalanirangko dakengkuon, campus-ko rakkianina aro mikkangchi bang·bata neng·nikanirangko  champengsoanina,  Pro VC-ni gadangko rakkianina,  iani kosako raken ku·cholsan ong·e jegalaniko  dakangkugen ine agandapkuaha.