TURA: Mongolbar salo, a·dokni Chief Minister Conrad K Sangma, Tura Bazar-ona re·ange, Krimasna koros ka·chichaenggipa manderangko, dokkan dakenggiparangko aro ramarango bi·ame cha·enggiparangko grongenba, Krismasni namgipa skaniko on·angtokaha.
Tura Super Market-o ua, bi·ame cha·enggipa adita sak manderangna boksisrangkoba on·angaha aro ia Krismaso uamangna adita ka·dimeanikoba ra·baaha.
Tura Bazar-ko nitobatate tarina gita adita salrangna skangsan a·dok sorkari, gong kror 16 tangkarangko chamataha aro mikkang bilsini Krismasode, Tura Super Market-ni dingtanganiko aro nitobataniko nikna ka·dongenga ine a·dokni Chief Minister, Tura Super Market-ko niangani somoio kobor ra·timgiparangna parakataha.
