Bazar antidamrango manderang koros ka·chichatoka
TURA: Garo Hills gimikon manderangni kusi ong·bee Krismasna nichaksoanirangko aro tarisamsoanirangko nikna man·engaha.
Petrol pump-rango manderangni apchangketpile petrol aro diesel-rangna riting dake senganirangko nikna man·aha aro bazar antidamrangoba, manderangni nanga bosturangko aro bi·sarangna chola ba·ra gital ra·na apchangketpile koros ka·anirangko nikna man·aha.
Bilsiantian Garo Hills-o da·o gita Krismasni somoirangon dokkan dakgiparangni bang·bate lap man·anirangko nikna man·ronga aro uandaken ia changoba chola ba·ra palgipa dokkanrangsan ong·aigija, cha·ani dokkan, light dokkan aro uandake dingtang dingtang bosturangko palenggipa dokkanrangba laprangko man·rikpana cholko ra·tokengaha.
Ia changoba batanggimin bilsirango gitan Tura Bazar aro dingtang dingtang biaprango dokkan dakgiparang, mitamrangde palnanga aro mitamrangde palnangjaenga ine agantokaha.
“Ia sal somoirango manderang, online gitasa pilak bosturangkon bretokengahani gimin Krismasni somoirangoba skango gita bosturangko palna man·jaha. Skang salrangode da·o gita Krismasni somoi sokahaon chinga neng·takna man·pilgija bosturangko palnangachim indiba da·ode bang·bata manderangan biap nina aro ronasa bazaar-ona re·batokaiaha indiba bostu bregiparangde namen komiaha,” ine Tura Super Market-o ba·ra dokkan dakgipa mande saksa aganaha.
Indake ong·genchimoba, mitam dokkanrangde skango gitan apsan daken bosturangko palnangkuaienga ine agantokskaaha.
Manderangni koros ka·e tarisamsoasan ong·aigija Garo Hills-ni pilak biaprangon light-rang aro ma·manti bosturangchi songtangtang noktangtangko taritilonganirang aro chrok-mesae an·sengsotokanirangkoba nikna man·engaha.
Krismasni somoio Garo Hills gimikon songni gita, gittimni gita, mondolini gita aro ma·drang maharini gita apsan cha·rim ringrimanirangko dakrongani gimin ia changoba apsan dake jinma cha·rim ringrimna program-rangko tarisamsotokengaha aro iana songtangtango ba gittimtangtangon jinma melie tangka paisarangkoba gile korosrangkoba ka·samsotokengaha.
