SHILLONG: Adita salrangna skang, Meghalaya a·dokni ning·o donggipa songni manderangko, Bangladesh a·songoni napsrukbagipa dolsa manderang, silchidarerangko mesoke dakait dakani ja·man, Meghalaya aro Bangladesh a·songni gisepo donggipa simarangko bilakbate nirokna a·dok sorkari ku·rachakaha.
Re·anggipa December-ni 17 tariko, Umniuh Tmar songni me·chik sakbri aro me·asa saksako Bangladesh a·songni manderang dakait dakenba, sonani gandingrang, mobile phone-rang aro tablet-rangko ra·seke ra·angaha aro iani ja·man a·dokni simarango bilakbate nirok sandianirangko dakna a·dok sorkari ja·ku de·chakataha.
“A·dokni simarango iandakgipa a·selrang ong·engani gimin chinga suk ong·ja aro Bangladesh a·song baksa nangchapgipa km 443 simarango bilakbate nirikkichina chinga Border Security Force (BSF) aro a·dokni police-rangna ge·etaniko on·aha,” ine a·dokni Deputy Chief Minister aro Home Minister Prestone Tynsong, kobor ra·timgiparangna parakataha.
Ia a·sel ong·gipani bidingo chanchirimna gita a·dok sorkari, BSF-ni Inspector General aro a·dokni Director General of Police (DGP) baksa tom·aniko ong·atangenba, simarango bilakbate nirok sandianirangko dakna tik ka·angaha ineba ua aganaha.
“Bangladesh a·songo so·sojengjeng ong·engani gimin chinga simarango mikrakbate kamrangko ka·na nangenga,” ineba ua aganaha.
Bangladesh a·songni manderang, Meghalaya a·dokona napsrukbae, songo noko manderangni gama ge·anirangko cha·urongenga aro songni manderangko ka·mikkenatrongenga ineba a·dokni Deputy Chief Minister parakataha.
“Simarango BSF sipairang dongjamiting somoirangosa Bangladesh a·songni manderang, napsrukbaenba, iandakgipa ong·gija kamrangko ka·rongenga,” ine ua aganaha.
