WILLIAMNAGAR: East Garo Hills a·jani Rongbing A·pot songo Rongon chibimako kabate rikenggipa dolongko matchotangengaha aro ia dolongko re·baenggipa 2026 bilsini March jaode matchotnaba dongaha.
Iako Mongolbar salo, a·dokni Cabinet Minister aro Williamnagar-ni MLA Marcuise N Marak, dolongko nieani ja·man social media-o parakataha.
Ia dolongko rikani kamrang matchotahaode, Rongbing A·pot, Rongbinggre aro samba jolrango donggipa songrangona re·ruraanirango altubatgnok ineba Marak parakataha.
“Rongbing A·pot songo Rongon chibimako kabate rikenggipa dolong da·o bimang ong·engaha aro slab-ni kamrangsan dongaiahani gimin ia dolongko re·baenggipa 2026 bilsini March jaode matchotna ka·dongenga. Ia dolongko rika matchotahaode, Rongbing A·pot, Rongbinggre aro dingtang dingtang songni manderang, re·a doanio neng·nikanirang komignok,” ine Williamnagar MLA, an·tangni Facebook Page-o parakataha.
