SHILLONG: Garo Hills-oni Assam-ona Brahmaputra chibimako kabate tariangenggipa Dhubri-Phulbari dolongko rikani kamrang da·o 65 percent-ni gita matchotaha aro ia dolongko matchotna gita bilsi gittammang nangkunaba gnang.
Iani bidingo u·iataniko on·atengon, ia kilometre 19.28 ong·gipa four lane dolongko rikani da·o 65 percent-ni gita matchotaha ine National Highways & Infrastructure Development Corporation Ltd (NHIDCL) parakataha.
Ia dolongko rikmanahaode Garo Hills-osan ong·aigija Meghalaya a·dok gimikon bading chiwalanirang tang·dona gita ka·dongenga aro ia dolongko rikanichi North Bengal-ona kilometer 50-mangni gita bakkandikbatgnok.
Dhubri-oni Phulbari-ona taribaenggipa dolongko rikna gita 2019-2020 bilsirango a·bachengahachim aro ian Dhubri-oni Tura, Nongstoin aro a·dokni gipin biaprangonaba rama gita songreani chol ong·gnok.
Ia dolongko gong kror 4,997 korosrangchi rikenga aro ian chibima dilgniko chobate songrena nanggipa Assam aro Meghalaya a·dokni manderangna namgni ong·gnok.
NHIDCL-oni u·iatani gitade, da·o dipet ia Dhubri-Phulbari dolongko rikanio 64 percent-ni gita koros ong·engaha.
“A·bachengo tik ka·samsogimin gitan kamrang matchotangengani gimin ia dolongko 2028 bilsiode matchotna ka·dongenga. Oe beben, ia dolongko rikanio Meghalaya a·dokchipaknide on·tisa ja·manchakenga indiba Assam-chipaknide uamang, ge 34-35 krongrangko songmanahani gimin kamrang kraa gita ta·rakenga,” ine adita salrangna skangsan a·dokni dilgiparang parakataha.
Ia dolongara salgro salaram a·dokrangna dingtanganiko ra·baani gita ong·gnok ine janapatskaengon, “Ia ramara sepangbatengahani gimin ia dolongko rika matchotahaode gari gorarang bang·batan ia dolong gitasa Guwahati songjinmachipakna re·tokgnok aro ia dolong gitan dingtang dingtang bading chiwalani kamrangnaba re·ruratokgnok. Unbaksana Meghalaya a·dokoni a·songni gipin biaprangonaba ia dolongan western entry aro exit gita ong·gnok,” ine dilgiparang aganaha.
