SHILLONG: Assam a·dokko man·chape, India a·songni badiaba badiaba biaprango manderangni Krismas manianiko badiaba dolni manderang golmal ka·na jotton ka·aha ine koborrangko man·soani ja·man, iandakgipa kamrangko Meghalaya a·dokni Bharatiya Janata Party (BJP)-ba raken jegalataha aro dos dakgipa manderangna a·songni dongimin niamrango pangchake, rakbatsranggipa sastirangko on·china dabiangaha.
Meghalaya BJP-na ku·wattimgipa Mariahom Kharkrang-ni parakatani gitade, India a·songo songdongenggipa manderangna Krismasko jakgitele aro mamingna kenani gri manina gita niam bidikon bilko on·manaha aro iandake Kristianrangni Krismas manianiko golmal ka·aniara a·songni niam bidikkon pe·ani gita ong·a.
Krismasara ka·saani, tom·tomani aro ku·mong nangrimaniko mesokanisa ong·a ine janapatengon, ia salko India a·songni pilak biaprango, pilak jatrangan kusi ong·e manironga ine Kharkrang parakataha.
“A·songni badiaba badiaba biaprango jakkomsa manderangni iandake Krismas manianiko golmal ka·aniara namen ka·beani ong·a aro ian Krismasni miksongani aro a·gilsak gimiko ka·saaniko gipatna manianiko mande ra·gija mesokani ong·a. Iandakgipa kamrangara, India a·songni niam bidikko pe·ani gitaba ong·a,” ine Meghalaya BJP-na ku·wattimgipa parakataha.
BJP-de a·songo pilak torom aro jatrangni niam bidiko pangchake, ku·mong nangrimaniko bebera·gipasa ong·a ine janapatengon, pilak jat aro toromrangan, an·tangtangni bebera·anio pangchake olakkina aro manina bilrang donga ine Kharkrang parakataha.
Iandakgipa kamrangko ‘politics’ kal·na jotton ka·enga ine janapatengon, ian politics-ni man·gnina badiaba ong·gija dakgipa manderangni kamrangsan ong·aia ine Kharkrang talataniko on·angaha.
“Ia 2025 bilsiko man·chape, bilsiantian a·songni Prime Minister aro BJP-ni dal·dalgipa dilgiparangba Krismas manianio bak ra·enga aro ian BJP-ni pilak jat aro toromna mande ra·aniko mesokani ong·a,” ine Meghalaya BJP-ni dilgipa parakataha.
Krismas manianiko golmal ka·gipa manderangni kosako rakbatsranggipa sastirangko on·china dabianio BJP-ba, a·songni manderang baksa bakrimenga ineba Kharkrang parakataha.
