SHILLONG: Re·baenggipa 2026 bilsio ong·atna sienggipa Garo Hills Autonomous District Council (GHADC) election-o susana gita Garo Hills election committee-ni report-na sengkuenga ine United Democratic Party (UDP)-ni general secretary Titosstarwell Chyne parakataha.
Chyne-ni parakatani gitade, ia report-ko Gital Bilsiko maniani ja·man on·atgen ine Garo Hills election committee, UDP-ni dilgiparangna u·iataha.
GHADC election-o UDP susana tik ka·engoba, candidate-rangko seokani aro badita dam constituency-rango susagen, iani bidingo UDP-ni dilgiparang tik ka·na man·kujaengachim.
GHADC election-ni bidingo chanchina gita UDP-ni dilgiparang, Garo Hills-ni committee-na chu·gimik bilko pakwatmanaha ineba Chyne parakataha.
GHADC election-o UDP, baditaba dam constituency-rangode susatelgen indiba iako Garo Hills-ni dilgiparangsa tik ka·gen ine UDP-ni president Metbah Lyngdoh-ba parakataha.
“GHADC election-nade chinga Garo Hills-o dolsa dilgiparang donga aro da·o dipet uamang chingna bon·kamgipa report-ko on·kuja. Indiba GHADC-ni adita seat-rangode chinga candidate-rangko susaatnaba gnang,” ine UDP president aganaha.
Re·baenggipa antirangosa GHADC election-ni bidingo party-ni dilgiparang nambate chanchinaba gnang ine Lyngdoh parakataha.
