Uttarakhand-o Tripura-ni chatro saksako doke siatanina CoMSO jegala

SHILLONG: Adita salrangna skang, Uttarakhand a·doko Tripura a·dokni bilsi 24 ong·gipa MBA chatro Anjel Chakma-ko kragija dake chadrapenba siatahani gimin Confederation of Meghalaya Social Organisations (CoMSO), kalimpaaniko, ka·a ding·chaoaniko aro ia a·seko raken jegalataha. Ia chatro, Uttarakhand a·doko, kal·stekako aro doke roako man·enba December-ni 26 tariko siangna gita nangahachim.
Salgro salaram jolni manderangko iandake a·songni dingtang dingtang biaprango kal·ake aro dokkol ka·e rona jotton ka·rongani gimin suk ong·gijaniko parakatengon, salgro salaram jolni manderangko pangnan Bengaluru aro Delhi songjinmarangko man·chape India a·songni dal·dalgipa songjinmarango pangnan iandake sasti on·e rona jotton ka·ronga aro ia chadambeba, iani a·selan janggitangko gimaatna nangaha ine CoMSO parakataha.
“Iandakgipa a·selara changsa changgnisan ong·enga ong·ja indiba Bengaluru, Delhi ba Dehradun gita dakgipa biaprango, salgro salaramni chatro chatrirang ba gipinrangba iandake chonnike roako, sasti on·e roako aro dokkol ka·e roako chakna nangronga,” ine CoMSO parakatenba, ia chatroko so·otanio jak donggipa mandeni kosako ta·raken bichal ka·china Uttarakhand sorkari aro ma·mongni Home Affairs Ministry-ko didiataha.
“Koborko man·ani gitade, ia chatroko chadrapanio jak donggipa sakbonga manderangkode rim·aha indiba mikkangchi iandakgipa a·selrangko champengna gita ia a·selo jak donggipa mongsonggipa mandeko ta·raken rim·enba rakgipa sastirangko on·na nanga,” ine CoMSO dabiangenba, a·songo iandake dingtang dingtang jatrangni kosako chonnik onnike roaniko aro kragija dake sasti on·e roaniko champengna gita National Anti-Racism Law-ko ra·gatchina ma·mong sorkariko didiataha.
A·songni dingtang dingtang biaprango poraienggipa aro kam ka·enggipa salgro salaram jolni manderangna ‘North East Helpine’-ko a·bachengatchina aro songjinma damantion dingtangmancha police cell-rangko kulina gita pilak a·dok sorkarirangna ge·etaniko on·china gitaba CoMSO, ma·mong sorkariko didiataha.