TURA: Dehradun-o MBA-ko poraienggipa Tripura a·dokni chatro saksako, kragija dake chonnikenba so·ote galanina jegale North East Students Organisation (NESO), Uttarakhand a·dokni Chief Minister Pushkar Singh Dhami-na sedoataha. Ia a·selko jegalatengon, dos dakgipa manderangni kosako rakbatsranggipa sastiko on·china gitaba NESO didiataha.
Ia NESO-o salgro salaram jolni mongsonggipa chatro chatrirangni dolrang, chong·motan Khasi Students’ Union (KSU), All Assam Students’ Union (AASU), Naga Students’ Federation (NSF), Mizo Zirlai Pawl (MZP), Twipra Students’ Federation (TSF), All Manipur Students’ Union (AMSU), Garo Students’ Union (GSU) aro All Arunachal Pradesh Students’ Union (AAPSU) dolrang bakrimenga.
Ia a·selni bidingo Uttarakhand a·dokni Chief Minister-na u·iatengon, “Tripura a·dokni bilsi 24-san ong·kuenggipa chatro Anjel Chakma-ko Dehradun songjinmao, adita sak manderang, kragija dake chonnike roani ja·man chakkuchi su·aha aro ua antigni batpile hospital-o dongani ja·man, December 26 tariko siangna nangaha. Unbaksana uni adagipa Michael Chakma-koba ia manderang, ka·saninggija dake chadrapaha. Salgro salaram jolni manderangara, India a·songni gipin bakrango songdongenggipa manderang baksa mikkang bimangrang dingtanggrikmangmangaiani gimin uamangko iandake kal·stapaha aro chakkuchi su·e so·otaha. Salgro salaram jolrango songdongenggipa manderangni kosako iandake ka·saninggija dakaniko NESO raken jegalenga,” ine NESO-ni dilgiparang parakataha.
Ia a·selko an·tangko jako ra·e niatchina gita Uttarakhand a·dokni Chief Minister-ko didiatengon, ia chatroko so·otanio jak donggipa manderangna siani sastiko on·china aro mikkangchi iandake salgro salaram jolni manderangko chonnik onnike roaniko champengna gita dingtangmancha police station-ko kulichina gita NESO didiataha.
Mikkangchi iandakgipa a·selrang ong·taijana gita Anti-Racism Act gita rakbatsranggipa niamrangko ra·gatchinaba NESO dabiangaha.
