Foreigners Act-o ILP gita dakgipa niamrangko on·dapna ma·mong sorkari ku·chaka

SHILLONG: Meghalaya a·doko niam gri napsrukanirangko champengna gita adita salrangna skang ra·gatgipa Immigration & Foreigners Act 2025-o Inner Line Permit (ILP) gita dakgipa niamrangko on·dapna ma·mong sorkari ku·rachakaniko on·aha.
Iako a·dokni Deputy Chief Minister aro Home (Police) Minister Prestone Tynsong, Mongolbar salo parakataha.
Tynsong-ni parakatani gitade, adita salrangna skang, New Delhi-o Union Home Minister Amit Shah-ko New Delhi-o grongeani somoio, a·dokni Chief Minister Conrad K Sangma aro a·dokni gipin dilgiparang, ILP aro gital Immigration & Foreigners Act 2025-ko man·chape dingtang dingtang niamrangni bidingo chanchirimaha aro ia Foreigners Act-o ILP gita dakgipa niamrangko on·dapna Union Home Minister, ku·rachakaniko on·ataha.
“Meghalaya a·doko ILP gita dakgipa apsan niamko ra·gatna, Immigration & Foreigners Act 2025 baksa maikai ILP-ni niamrangko ra·dimna man·gen, uarangni gimin chinga Union Home Minister baksa chanchiaha aro ia chanchirimanio Union Home Minister-ba ILP-ni niamrangko on·dapna kusi ong·e ra·chakaha. Ia gital niamni ning·o Meghalaya a·dokkoba chel·chakgipa biap dake parakna mikkang antini gisepon Union Home Secretary, a·dokni Chief Secretary aro Director General of Police (DGP) baksa tom·e chanchirimangnaba gnang,” ine Deputy Chief Minister Prestone Tynsong parakataha.
Tynsong-ni talatani gitade, ia Immigration & Foreigners Act 2025-o ILP gita dakgipa niamrangko on·dapahaon, India a·songni gipin bakrang aro gipin a·songrangoni re·baenggipa manderangba Meghalaya a·doko napna skang permit-ko ra·chengna nanggnok aro iachi a·dokona niam gri napsruke songdong a·chaanikoba champengna man·gnok.
“Ia gital Immigration & Foreigners Act 2025-ni ning·o chinga ILP gita apsananggipa niamrangko on·dapna miksongenga, jedakode Arunachal Pradesh a·doko gitan Meghalaya a·dokona re·baenggipa manderangba permit-rangko tarichengna nanggen. Ia Act-ni ning·o, je manderangan Meghalaya a·dokona re·baengachim, a·dokni entry point-rango donggipa facilitation centre-rango online gita register ka·na nanggen,” ine a·dokni Deputy Chief Minister aganaha.
Meghalaya aro Bangladesh a·songni gisepo km 443 simarang dongani gimin ia gital niamara, niam gri napsrukbaenggiparangko champengsoanio ILP-na baten nambate kamko ka·na man·gen ineba Tynsong aganaha.
Ia gital niamko a·dokni dingtang dingtang NGO-rang ra·chakgenma ine sing·anina aganchakaniko on·angengon, “Ian Immigration & Foreigners Act-o ILP gita dakgipa apsan niamko on·dapna miksonganisa ong·engani gimin ian namen bilakgipa niam ong·enga aro pilakan ia niamko namnikgen ine ka·donga,” ine Tynsong aganaha.