M’laya a·dokan B’desh-ni manderangna ‘katnapram’ ong·ani chol donga: KSU

SHILLONG: Bangladesh a·songo so·sojengjeng ong·engani gimin Meghalaya a·dokko man·chape salgro salaramni pilak a·dokrangnan kenchakna nangani ong·engon, Meghalaya a·doko gipin biaprangoni napsrukbaenggipa manderangko champengsona gita rakgipa niamrang dongkujani gimin Meghalaya a·dokan Bangladesh a·songoni napsrukbaenggipa manderangna ‘katnapram’ gita ong·ani cholrang donga ine Khasi Students Union (KSU), mikrakataniko on·angaha.
Bangladesh a·songo mitam dilgiparang, salgro salaram a·dokrangkoba ra·sekna ku·watsoanirangko nikna man·ahani gimin batanggimin sal somoirangonin, dingtang dingtang dolrang aro dilgiparang, iana kenchaksoaniko paraktokengachim ine nikna man·a.
KSU-ni general secretary Donald V Thabah-ni kobor ra·timgiparangna aganani gitade, Assam a·dokoba niam gri songdong a·chaenggipa manderangko a·rikgalna a·bachengahani gimin aro Bangladesh a·songoba re·anggipa bilsirangonin so·sojengjeng ong·engani gimin ia manderangna katnapna nambatgipa biapde Meghalaya a·dokan ong·enga.
“Bangladesh a·songo so·sojengjeng ong·anirang batroroangkua ong·ode Meghalaya a·doko napsrukanirang batroroani cholrang donga. Inner Line Permit (ILP) donggipa a·dokrangde, iandake napsrukanirangko champengna man·a indiba Meghalaya a·dokode iandakgipa niamrangba dongkuja,” ine KSU-ni general secretary aganaha.
Meghalaya a·doko ILP gita dakgipa niamrang dongkujani gimin napsrukna jotton ka·gipa manderangde iandakgipa cholrangko ra·aigen aro ian a·dokni Tribal jatrangnasa kenchakna nangani ong·enga ineba ua aganaha.
Niam gri napsrukanirangko champengna gisik nangjagenchimode ja·mano Tribal jatrangkon komibatatgen ine mikrakataniko on·angengon,  a·doko songdongenggipa Tribal-rangko chel·chakna gita ILP aro gipin rakgipa niamrangko ra·gatchina Thabah dabiangtaiaha.
Meghalaya a·doko niam gri napsrukanirangko champengna gita gital ra·gatgipa Immigration & Foreigners Act 2025-o Inner Line Permit (ILP) gita dakgipa niamrangko on·dapna ma·mong sorkari ku·rachakaniko on·aha ine Mongolbar salosan a·dokni Deputy Chief Minister aro Home (Police) Minister Prestone Tynsong parakatahachim.
Tynsong-ni parakatani gitade, adita salrangna skang, New Delhi-o Union Home Minister Amit Shah-ko New Delhi-o grongeani somoio, a·dokni Chief Minister Conrad K Sangma aro a·dokni gipin dilgiparang, ILP aro gital Immigration & Foreigners Act 2025-ko man·chape dingtang dingtang niamrangni bidingo chanchirimaha aro ia Foreigners Act-o ILP gita dakgipa niamrangko on·dapna Union Home Minister, ku·rachakaniko on·ataha.
“Meghalaya a·doko ILP gita dakgipa apsan niamko ra·gatna, Immigration & Foreigners Act 2025 baksa maikai ILP-ni niamrangko ra·dimna man·gen, uarangni gimin chinga Union Home Minister baksa chanchiaha aro ia chanchirimanio Union Home Minister-ba ILP-ni niamrangko on·dapna kusi ong·e ra·chakaha. Ia gital niamni ning·o Meghalaya a·dokkoba chel·chakgipa biap dake parakna mikkang antini gisepon Union Home Secretary, a·dokni Chief Secretary aro Director General of Police (DGP) baksa tom·e chanchirimangnaba gnang,” ine Deputy Chief Minister Prestone Tynsong parakataha.
Tynsong-ni talatani gitade, ia Immigration & Foreigners Act 2025-o ILP gita dakgipa niamrangko on·dapahaon, India a·songni gipin bakrang aro gipin a·songrangoni re·baenggipa manderangba Meghalaya a·doko napna skang permit-ko ra·chengna nanggnok aro iachi a·dokona niam gri napsruke songdong a·chaanikoba champengna man·gnok.
“Ia gital Immigration & Foreigners Act 2025-ni ning·o chinga ILP gita apsananggipa niamrangko on·dapna miksongenga, jedakode Arunachal Pradesh a·doko gitan Meghalaya a·dokona re·baenggipa manderangba permit-rangko tarichengna nanggen. Ia Act-ni ning·o, je manderangan Meghalaya a·dokona re·baengachim, a·dokni entry point-rango donggipa facilitation centre-rango online gita register ka·na nanggen,” ine a·dokni Deputy Chief Minister aganaha.