NE-ko B’desh-o napatna ka·mikkenataniko ‘nom·e’ ra·jachina NPP didia

SHILLONG: India a·songni salgro salaram a·dokrangko Bangladesh a·songni bak ong·atna gita ka·mikkenataniko ‘nom·e’ ra·jachina aro iani bidingo gisik nangbate ja·kurangko de·china National People’s Party (NPP), ma·mong sorkariko didiataha.
Iani bidingo kobor ra·timgiparangna talataniko on·angengon, iandakgipa ka·mikkenatanirangna ma·mong sorkari gisik nangbebeenga ong·ode, bilakgipa niamrangko ra·gatan baksana Meghalaya aro Bangladesh a·songni pilak simarangon bilake kapengna nangenga ine NPP-ni state working president Hamletson Dohling parakataha.
Border fencing ba simarangko kapengenggipani bidingo janapatengon, a·song damgnini simarangko kapenganichi, a·dokko chel·chakanio chu·sokgipa ong·na man·na gita India sorkari aro dingtang dingtang dolrang, jekai a·a nokgiparang, songni nokni dilgiparang, Nokma-Sordarrang baksa nambate kamrangko ka·na nangenga ine Dohling aganaha.
Meghalaya a·dokni simarangko chel·chakenggipani gimin janapatskaengon, a·song damgnini simarangko Border Security Force (BSF) nirokenga aro a·dokni police-rangba, kamtangtangko chu·sokatengani gimin simarango chel·chakani kamrang chu·ongaienga ine NPP-ni state working president aganaha.
Indake ong·genchimoba, Bangladesh a·songo dingtang dingtang dilgiparangni ka·mikkenatanirangko ‘nom·e’ ra·na gita nangja aro mikrake kamrangko ka·sona nangenga ine ua aganskaaha.
“Gipin a·songrangoni iandakgipa ka·mikkenatanirangko on·on, ma·mong aro a·dok sorkari dolgnian mikrakbate aro tarisamsoe dongna nanga maina darangba mikkangchi mai ong·gen, ukode agansona man·ja,” ine Dohling aganaha.
Gipin biaprangoni napsrukbae songdong a·chaanirangko champengna nangengani gimin janapatskaengon, ian Meghalaya a·dokna mingsa rakbegipa ra·biani ong·kuenga ine NPP-ni dilgipa aganaha.
Dohling-ni parakatani gitade, a·dokona niam gri napsrukanirangko champengsoanirang dongjani gimin 1978 bilsionin Khasi Students Union, sorkarini kosako jegalanirangko dakdilenga.
“Skango agansogimin kattarang da·o be·en pil·na siengaha. Gipin biaprangoni niam gri napsrukanirangchi da·o Meghalaya a·dokko man·chape salgro salaramni pilak a·dokrangnan kenchakna nangani ong·enga. Mongsongbate ia sal somoirango Bangladesh a·songo ong·enggipa obostarangni gimin an·ching mikrake dongna nangenga,” ine ua aganaha.