SHILLONG: National Youth Festival – Viksit Bharat Young Leaders Dialogue (VBYLD) 2026-na seokako man·gipa chadambe delegate-rangna Sukrobar salo, Meghalaya sorkarini Sports & Youth Affairs department, My Bharat Kendra baksa nangrime, ‘Meet & Greet’ program-ko Shillong songjinmani Lok Bhavan, Governor’s House-o ong·atangaha.
Ia program-ko ong·atanio, a·dokni Governor CH Vijayashankar bak ra·enba, chadamberang baksa agangrikengon, Viksit Bharat Young Leaders Dialogue 2026-o bak ra·na gita dingtang dingtang gadangni seokanio chu·sokgipa ong·e seokako man·ahani gimin an·tangni kusi ong·chakaniko parakangaha.
Dilgipa ong·anide biming ba gadangko man·anisan ong·ja indiba songsalna dangdike on·anio, an·tangtangni gunko mesokaniba ong·a ineba Governor aganaha.
Kakket dilgipani gunde bilko man·animangmangsan ong·aija indiba sakgipinrangna cholko on·anisa ong·a ine janapatengon, an·tangtangni miksonganirangko chu·sokgipa ong·atna gita pangnan kamtango bimchipgiparang ong·china aro namgipa bewalko ja·rikchina gita a·dokni Governor, ia program-o bak ra·gipa chadambe sakantikon didiangaha.
Kamtangtango chu·sokgipa chadamberangni gimin toe aganangengon, an·tangni bebera·ani aro rake kamko ka·anichi bilsi 20 ong·on Mount Everest-ona doanggipa Meghalaya NCC-ni chatri Rifiness Warjri-ni gimin Governor janapangaha.
National Youth Festival – Viksit Bharat Young Leaders Dialogue 2026-o bak ra·na gita seokako man·gipa chadamberangba, an·tangtangni chu·sokgipa ong·e, ia program-o bak ra·pana man·engani gimin kusi ong·aniko parakangtokaha.
Seokako man·gipa chadamberang, re·baenggipa January 11 tariko, National Youth Festival-ko ong·atanio, a·songni Prime Minister Narendra Modi-ko gronge agangrikna cholko man·gen.
