SHILLONG: Meghalaya a·dokni Mawlyngkhung-oni Assam a·dokni Panchgram-ona tarina sienggipa high speed corridor-na National Highways & Infrastructure Development Corporation Limited (NHIDCL), re·baenggipa February 28 tarikni gisepon tender-ko on·na miksongenga.
Official-rangni u·iatani gitade, ia dal·begipa project-na NHIDCL, project planning aro environmental clearance-koba matchotaha aro kamrangko re·baenggipa antibri ba antibongani gisepon a·bachengatna ka·dongenga.
Ia ramani mitam bakrangde Assam a·dokosa ga·akengani gimin sorkari, ia project-na a·arangkoba ra·na a·bachengataha.
Ia project-na India sorkari, gong kror 22,864 korosko hisapenga aro ian Shillong songjinmani samba jolo donggipa Mawlyngkhung-oni Silchar sambao donggipa Panchgram-ona kilometre 166.8 ong·gipa rama ong·gen.
Ia ramako taria matchotahaode, ian salgro salaram jol gimiko high speed corridor dilsamangmang ong·pagnok aro ian Myanmar a·songni Kaladan Multi-Modal Transit Transport Project-oba nangdime, salgro salaram aro Kolkata-ni gisepo chi gita dingtang ramako bikotani ong·gnok.
National Highways & Infrastructure Development Corporation Limited (NHIDCL)-o kamko ka·enggipa official saksani aganani gitade, ian Act East Policy-ni ning·o India a·songni re·a doani kolrango namdapatanio mingsa mongsonggipa bak ong·enga.
Ia gital ramani km 144.8-de Meghalaya a·dok gita ong·gen aro km 22-kosan Assam gita nappakengani gimin ian Meghalaya a·doknasan ong·aigija Manipur, Mizoram aro Tripura a·dokrangnaba namgni ong·gnok.
Ia Shillong-Silchar ramako 2030 bilsini gisepo matchotna ka·dongenga aro ua somoion India aro Myanmar a·song damgnini bakrime ra·gatgipa Kaladan project-koba matchotna ka·dongenga ine NHIDCL official parakataha.
