SHILLONG: Adita salrangna skang, Tripura a·dokni chatro saksako Uttarakhand a·dokni Dehradun songjinmao chakkuchi su·e chadrapani ja·man, ia chatro siangna nangahani gimin National People’s Youth Front (NPYF) raken jegalataha.
Mikkangchi salgro salaram jolni chatro chatrirangna naljokaniko on·na man·na gita iani bidingo rakgipa ja·kurangko de·china gitaba NPYF, Uttarakhand sorkariko didiataha.
Ia a·selna an·tangni suk ong·gijaniko parakatengon, sianggipa chatroni nokdangna NPYF-ni national president Nicky Nongkhlaw, an·tangni kalimpaaniko on·ataha.
Tripura a·dokni chatro Anjel Chakma-ko kragija dake chadrapaniara namen dongtogijaniko aro ra·chakna man·gijaniko ra·baa ine janapatengon, salgro salaram jolni manderangko iandake chadrapaniara changsa changgni ong·gipa a·sel ong·ja indiba bang·bata changon, chonnike rona aro sasti on·e rona jotton ka·anirangko nikna man·enga ine Nongkhlaw parakataha.
“Salgro salaram jolni chatro chatrirangko pangnan iandake kal·ake rona aro chadrapna jotton ka·aniara namen jajrengna nangani ong·enga aro iandakgipa kamrangko ta·raken namatna nangenga,” ine NPYF president parakataha.
Ia chatroko kragija dake chonnik onnike roani ja·man chakkuchi su·anina rakbatsranggipa kattarangchi jegalatengon, mikkangchi iandakgipa a·selrang ong·taijawa ine Nongkhlaw, an·tangni ka·dongchakenganiko parakataha.
Ia a·selko gisiko nange jako ra·china aro dos donggipa manderang pilakkon ta·raken rim·china git aua Uttarakhand a·dokni Chief Minister-na sedoataha ineba NPYF president parakataha.
Dingtang dingtang a·dokrango poraienggipa salgro salaram jolni chatro chatrirangna naljokaniko on·na man·na gita simsak nirokanirangko dakchinaba ua dingtang dingtang a·dok sorkarirangko didiataha.
