SHILLONG: Adita salrangna skang, Assam a·dokni Nalbari-o donggipa St Mary’s English School-o Krismasna taritilonganirangko Vishva Hindu Parishad (VHP) aro Bajrang Dal-o bak ong·enggipa manderangni kragija dake nosto ka·e galan baksana a·songni dingtang dingtang biaprango Kristianrangko kragija dake chadrapanirang batroroengani gimin National People’s Party (NPP) suk ong·gijaniko parakataha.
NPP-ni state working president Hamletson Dohling-ni parakatani gitade, je biaprangon iandake Kristianrangni kosako chadrapanirangko nikna man·aha, uandakgipa a·dokrango rakgipa ja·kurangko de·na gita a·dok sorkarirangna seatchina a·dokni NPP, Meghalaya sorkariko didigen.
“Iandakgipa a·selrangko chinga raken jegala aro mikkangchi iandakgipa a·selrang ong·taijachina didiata. Chinga iandake Kristianrangni kosako chadrapanirangko maming dakeba ra·chakna aro chakchikchana man·jawa,” ine Dohling aganenba, iani bidingo ua an·tangan a·dokni Chief Minister Conrad K Sangma baksaba agangrikaha ine parakataha.
India a·songara pilak toromrangko mande ra·gipa a·songsa ong·a aro saksa sakgipinko mande ra·grikaniara nangchongmotgipa ong·a ine janapatengon, iandake jatsa jatgipin aro toromsa toromgipinko kragija dake chadrapaniara a·songni meli nangrime donganiko nisigalani gitasa ong·gen ine NPP-ni state working president mikrakataniko on·angaha.
Iako a·dok aro ma·mong sorkari dolgnian name nirokna nanga ineba ua aganaha.
Iani bidingo NPYF-ni national president Nicky Nongkhlaw-ba Chief Minister-na sedoate, Union Home Minister Amit Shah baksa agangrikchina didiataha.
