SHILLONG: Meghalaya a·dokni saliram jolon Mendipathar Railway Station dongmanahani gimin salaram jolrango, mongsongbate Khasi aro Jaintia Hills a·jarango rel garirangko jegale maming namgni dongjaenga ine Voice of the People’s Party (VPP) parakataha.
Iani bidingo kobor ra·timgiparangna talataniko on·angengon, Garo Hills-ode Mendipathar Railway Station dongmanahani gimin Khasi aro Jaintia Hills a·jarango rel garirangko jegalsoe maming namgni dongjaenga, maina Garo Hills gitan niam gri napsrukbaenggipa manderang, a·dokni dingtang dingtang biaprangona re·bana man·enga ine VPP-na ku·wattimgipa Batskhem Myrboh parakataha.
A·dokni dal·roroanina rel garirangkoba a·dokna nangchongmota ine janapatengon, a·dokni mitam bakrangode rel ramarang dongmane, mitam bakrangode rel ramarangko tarina on·skajaengani gimin Myrboh sing·doataha.
Garo Hills-ni Mendipathar-ona rel ramarangko taribaahani gimin Khasi-Jaintia Hills a·jarango rel ramarangko jegalsoanichi, niam gri napsrukanirangko champengna man·jawa ine janapatengon, “Gipin biapni manderang, Khasi Hills-ona rel garirango re·bana miksongenga ong·ode, uamang Garo Hills gitan re·bana man·aigen,” ine Myrboh aganenba, iandake rel garirangko a·dokni mitam bako ra·chake, mitam bakrango jegalaniara maming namgnikon ra·bajaenga ine parakataha.
A·dokni mitam bakrangode, niam gri napsruke songdong a·chaaniko champengna maming niamko ra·gatchenggija rel ramarangko tarimanahani gimin maikai Inner Line Permit (ILP)-na dabianiko rel rama bakrodapanio nangatena miksongenga ineba VPP-ni dilgipa, a·dok sorkariko sing·doataha.
“Niamrangko ra·gatchenggija a·dokni 50 percent biaprangode rel ramarangko ra·chakmanahani gimin maikai a·dok sorkari, ILP-na dabianiko rel rama bakrodapatanio nangatena miksongenga?” ine Myrboh sing·doataha.
A·dokni mitam biaprango, mongsongbate Khasi-Jaintia Hills a·jarango rel garirangko jegalsotokengani gimin a·dokni manderang bang·en noksan ong·ani cholrang donga ine Budbar salo, Bharatiya Janata Party (BJP)-ni dilgipa Mariamhom Kharkrang aganskaahachim.
“An·chingni a·dokona rel garirangko ra·bana on·jagenchimode an·ching an·tangtangan noksan ong·nasienggiparang ong·a. Bilsi 30 ba 40-ni ja·mansa an·chingni dedrang su·drangrang, maini gimin rel garirangko a·dokona ra·baja ine sing·donaba gnang,” ine Kharkrang aganenba, rel garirangko ra·baanichi a·doko bading chiwalani aro pilakni gitan namroro silroroanikoba ra·bana man·gen ine parakataha.
Guwahati songjinma baksa tosusae Meghalaya a·doko dingtang dingtang bosturangni dam rakbataniara, rama gita re·baenggipa garirango pangchakani a·selan ong·enga ineba BJP-ni dilgipa talataniko on·angaha.
“A·gilsakni pilak biaprangon an·chingni ramram rama gita songre songgabatanian dam rakbatsranggipa ong·a. Ian an·chingni bazaar antirango bosturangnaba nangchakeaniko ra·baa aro manderangna bal-bojako ra·baa,” ine Kharkrang aganaha.
Rel garirangko ra·baanichi niam gri napsrukbagiparang batrorogen ine dingtang dingtang dolrangni kenchaktokenggipani bidingo janapatengon, rel garirangon gipin biaprangoni re·baenggipa manderangkode nambate nirokna man·a ine Kharkrang parakataha.
“Rel garirangkode tik ka·gimin station-rang gitasa wata aro ia railway station-rangode rakgipa niamrangko dona. Ramarang gitade je somoioba manderang re·na dona man·aiani gimin an·ching name nirokna man·ja,” ine BJP-na ku·wattimgipa talataniko on·angaha.
