PWD ramao niam gri songdongenggipani bidingo ja·kuko de·jaenganina FAC suk ong·ja

TURA: West Garo Hills a·jani a·kawe jolo donggipa Gomaijhora-oni Garobasti-ona PWD ramao niam gri napsruke songdongenggipa manderangni bidingo badi ka·ani ja·manba a·dok sorkari aro District Administration, maming ja·kurangko de·jaenga ine Phulbari jolo donggipa Fight Against Corruption (FAC) dol, suk ong·gijaniko parakataha.
FAC dolni u·iatani gitade, Gomaijhora-oni Garobasti-ona dakanggipa ramao wa·arangko kapengenba, mitam manderang kangdrana jotton ka·enga ine jagnimangna skangan, November jani 12 tariko, West Garo Hills a·jani Deputy Commissioner-na badi ka·doangahachim indiba da·alona kingkingan ia sorkari ramao niam gri songdongenggipa manderangko a·rikgalna gita maming ja·kurangko de·kujaenga.
“West Garo Hills a·jani dingtang dingtang biaprangko a·dokni gipin biaprang baksa nangdimeatna gita a·dok sorkari, Gomaijhora-oni Garobasti songona PWD ramako tarie on·aha aro ia ramako name rakkina gita da·o retaining wall-rangko tarina a·bachengatahachim. Indake ong·genchimoba, Gomaijhora-o songdongenggipa mitam manderang, an·tangtangni man·gnina chanchie, ia ramao retaining wall rikaniko champengenga aro ia ramani biaprangko kangdrana gita wa·arangchi kapengtokaha,” ine FAC-ni dilgiparang parakataha.
“Ia ramako wa·arangchi kapengenba kangdrana jotton ka·engani a·sel ramarang apchonatako man·e, re·ruraenggipa manderang neng·nikanirangko chagrongna nangtokenga aro ian re·ruraenggipa manderangna kenchakna nanganiba ong·enga,” ineba FAC-ni dilgiparang parakataha.
Gomaijhora jolo songdongenggipa bang·a manderangan niamko pe·e, sorkarini ramao wa·arangko kapenge kangdrana jotton ka·tokenga ine janapatengon, iandake niam gri kangdrae ra·ako da·onin champengjagenchimode ja·mano gipinrangba apsan daken ia ramani a·arangko kangdrae ra·na jotton ka·gnok ine FAC parakatenba, ia ramao wa·a kapenge a·a kangdrana jotton ka·aniko ta·raken sandirokatenba, nanga gita ja·kurangko de·china West Garo Hills a·jani Deputy Commissioner-ko didiataha.
“Chingni badi ka·aoni da·o jagni ong·na sipilengaha indiba da·alonan iani bidingo sandirokanirangko dakaba dongkuja aro niam pe·giparangni kosako maming ja·kurangkon de·kujaenga. Uni gimin mikkangchi ia biaprangko niam gri ra·sekdrana man·jana gita ta·raken ja·kurangko de·china chinga didiattaienga,” ine FAC-ni dilgiparang parakataha.