TURA: Garo Hills-o Tribal ong·gijagipa manderangna niam gri bading chiwalna cholrangko on·engani a·selan adita salrangna skang, A·chik chadambe saksa Dilseng M Sangma so·otako man·na nangaha ine Robibar salo, Tura-ni MDC Bernard N Marak parakatenba, Garo Hills-o, mongsongbate Tura GDC constituency-ni ning·o licence gri ba tol·gipa licence-rangchi re·napbae bading chiwaljachina Tribal ong·gijagipa manderangna mikrakataniko on·ataha.
Tura constituency-ni ning·o bading chiwale cha·enggipa gipin jatrangna, Garo Hills Autonomous District Council (GHADC), niam gri Trade Licence (TNT)-rangko on·aha aro iako ua, GHADC-ni Taxation department-o RTI ka·e ma·sina man·aha ineba Marak parakataha.
“Garo Hills-ara Indian Constitution-ni Sixth Schedule ning·o on·gimin niamrangchi chel·chakako man·gipa biapsa ong·a aro iako pilakan mande ra·na nangchongmota. Niam bidikrangko pe·e skatang dakani bidingo anga District Administration aro GHADC-ni Chief Executive Membor (CEM)-naba u·iatmanaha aro niam gri ro·ong badingenggipani giminba anga CEM aro bilo ong·enggipa a·jani manderangna u·iatahachim indiba uamang gisik nangjahani a·selan Rajabala-o niam gri ro·ong quarry-ko chalaianichi dosgri mande saksa janggiko gimaatna nangaha,” ine Tura MDC parakataha.
Marak-ni parakatani gitade, West Garo Hills a·jani a·kawe jolrango niam gri chalaienggipa quarry-rang dam 52 donga indiba ia quarry-rangko chipna gita sorkari maming ja·kurangko de·jaengani a·selan uamang jakgitele ia quarry-rangko chalaina man·enga.
“Uni gimin Garo Hills-o pilak ong·gija dake bading chiwalanirangkon dontongatna nanga,” ine Tura MDC dabiangaha.
