GASUAPARA: Ma·mong sorkarini dingtang dingtang scheme-ni ning·o sal 60-ni hajirarangko gamchipja ine South Garo Hills a·jani Gasuapara C&RD Block ning·o donggipa Telekali songni manderang, Gasuapara Block Development Officer (BDO)-ni kosako FIR ka·doangaha.
Ia tangkarangara, 2024 bilsio sanction ka·gipa PMAY aro MGNREGA-ni convergence scheme-ni ning·o ong·achim ine kobor on·aha.
“Iani bidingo chinga, South Garo Hills a·jani Project Director-ko man·chape, BDO, PMAY In-charge aro MGNREGA in-charge-rangnaba chittirangko see u·iatahachim indiba uamangni aganchakanirangko man·chipjaha. Chingna man·na nanggipa hajirarangko on·chipgija donaniara, PMAY aro MGNREGA scheme-ni ning·o dongimin niamrangko pe·ani gita ong·a aro ching gita nok rikna tangka paisana senge dongenggipa manderangnade namen neng·nikaniko ra·baani gita ong·a,” ine songni manderang parakataha.
Hajirarangko on·chipgija donchaaniara, scheme-ko man·enggipa manderangnasan neng·nikaniko ra·baani ong·ja indiba Telekali songo, nok rikani kamrangko bon·chipatani gitaba ong·a ineba songni manderang parakataha.
“Telekali VEC-ni ning·o sak 50-na baten beneficiary-rang, an·tangtangni nokrangko matchotchipna man·kujaenga. Uni gimin iani bidingo ta·raken sandirokenba, Telakali songni manderangna sal 60-ni PMAY-MGNREGA-ni hajirarangko on·na man·na ja·kurangko de·china chinga didienga. Chinga an·tangtangni nokrangko matchote rikna, tangka paisarangko somoi gita sokatna nangchongmota,” ine Telekali songni manderang, Gasuapara police station-o ka·gipa FIR-o janapataha.
