WGH-o niam gri chalaienggipa quarry, bol badinganiko Forest dept rim·a

TURA: Adita salrangna skang, West Garo Hills a·jani Rajabala jolo, niam gri chalaienggipa ro·ong quarry-ko chipatna nina re·ange re·bapilengmiting somoio Goalgaon songo, ACHIK dolni membor-rangko, dolsa manderangni chadrapsoanio, membor-rangoni saksa siangani ja·man a·kawe jolrango niam gri chalaienggipa quarry aro karkanarangko Forest department-ni gita sandirokangkuenba, niam gri a·a cho·enggipa aro bol badingenggiparangko rim·taina man·aha.
Koborrangko man·soani ja·man January-ni 17 tariko Forest department-ni official-rang, Gumaijhora aro Chibinang-Chanupara (Gopgopara) jolrango, niam gri a·a cho·enggipa aro bol badingenggipa manderangko chadrapena man·aha.
Ia jolrango niam gri a·a, an·cheng bikotgiparangko aro bol badingsrukgiparangko Forest department-ni Assistant Conservator of Forest (ACF), District Administration aro Police department, nangrime am·sandienba, ia biap damgnio jakkalenggipa ma·manti bosturangko rim·na man·aha ine u·iataha.
Gomaijhora jolo niam gri, chiring sambaonikon an·cheng bikotenga ine kobor man·soenba, official-rang, police-rang baksa ua biapona re·angon, kam ka·soenggipa manderangde ua biaponi kate chakaha indiba a·a aro an·cheng bikotenggipa bosturangko aro kolrangko rim·na man·aha.
Ia biapo a·arangko cho·na gita JCB-ko jakkalenga ine kobor man·ani ja·man official-rang, JCB nokgipa sandie man·aha aro ja·man uko sing·sandina gita okamataha.
Iani ja·man official-rang, Chibinang sambao donggipa Chanupara (Gopgopara) joloba, maming lekka gri, matburingchi salgipa gario, bol salangengako rim·na man·aha aro ia gari baksana bolrangkoba official-rang rim·aha.
Official-rangni rim·gipa pilak bosturangko aro ostrorangko Hollaidanga Range office-ona ra·angaha aro iani bidingo official-rang, a·a nokgipa aro gari nokgiparangko sing·sandina okamataha ine Forest official-rang parakataha.