CM Conrad, A·dokna dakgrikdilgipa dilgiparangna mittelaniko on·a
BAGHMARA/TURA/RESUBELPARA: Chang 54-gipa Meghalaya Day ba Meghalaya a·dokko man·aoni bilsi 54 gapaniko Budbar salo, a·dokni dingtang dingtang biaprango maniangaha.
Ia chang Meghalaya Day-ni mongsonggipa program-ko South Garo Hills a·jani headquarter Baghmara-o ong·ataha aro ia tom·anio, a·dokni Chief Minister Conrad K Sangma, Deputy Chief Minister Prestone Tynsong, Education Minister Lahkmen Rymbui, dingtang dingtang dilgiparang, sorkari official-rang aro gipinrangba bak ra·angtokaha.
Ia manianio a·dokni Chief Minister, jinmana aganprakangengon, ia chang sorkarini gita Meghalaya Day-ko South Garo Hills a·jao manianiara a·dokni pilak biaprangon namroro silroroaniko ra·bana sorkarini on·kange kam ka·aniko mesokani ong·enga ine janapangenba, South Garo Hills a·jako ru·uta bilsirangna galchipahaoba da·o sorkarini kam ka·anichi, dingtanganiko nikna man·engaha ine parakataha.
A·dokni skanggipa Chief Minister Captain Williamson A Sangma sagini dilanichi, a·dokni pagitchamrang, ku·cholsan ong·e, an·chi pari nikani grisa a·dokko man·e on·ahani gimin ia salko Captain Sangma sagini a·jao manianiara namen krabegipa ong·aha ine Chief Minister aganaha.
Meghalaya a·dokko man·na krengdilanggipa a·dokni gitcham dilgiparangna mande ra·pilskaaniko on·angengon, skangonin Meghalaya a·dokni manderang ku·cholsan ong·e janggi tanggiparang ong·a ine ia apsan bewalkon ja·rikangkuchina gita Chief Minister, a·dokni dingtang dingtang jatrangko didiangaha.
South Garo Hills a·jao namroro silroroaniko ra·bana kamrangko ka·enga ine janapatengon, gong crore 140 ong·gipa Baghmara Water Supply Project-ni gnigipa bakna salsa skangan tangka paisarangko chamatmanaha ine Chief Minister parakataha.
Baghmara Civil Hospital-o kam ka·giparang, mongsongbate specialist doctor-rang chu·ongjae neng·nikanirangko chagrongna nangenga ine janapatengon, ia hospital-na sorkari specialist doctor-rangko, nurse-rangko aro gipin kam ka·giparangko ta·raken kamo rakkignok ine Chief Minister ku·rachakaniko on·angaha.
Ia tom·anio jinmana aganprakanggipa gipin manderangara, a·dokni Deputy Chief Minister Prestone Tynsong, Education Minister Lahkmen Rymbui, a·dokni Chief Secretary Dr Shakil P Ahammed aro gipinrang ong·a.
Tom·ani a·bachengachibara, Shillong-ni Khmih Choir, State Anthem-ko ring·dilaha.
Tura-o chang 54-gipa Meghalaya Day-ko DC Park-o maniangaha aro ia manianio, West Garo Hills a·jani Deputy Commissioner Vibhor Aggarwal, mongsonggipa sokgipa ong·e bak ra·angaha. Ia salko manianio, West Garo Hills a·jani Superintendent of Police (SP) Abraham T Sangma, Additional Deputy Commissioner (ADC) Nipon Hajong, Tura SP (Traffic) Rupam R Marak, dingtang dingtang official-rang, skigiparang, toromko dilgiparang aro gipinrangba bak ra·angtokaha.
Ia tom·anio West Garo Hills a·jani Deputy Commissioner, jinmana aganprakangengon, Meghalaya a·doko Khasi, Jaintia aro Garorang, mongsonggipa jatrang ong·a indiba gipin jatrang baksaba meli-nangrime songdong a·chana nanga ine didiani kattarangko aganangaha.
Meghalaya a·dokko man·chengbaani ja·man a·dokni dal·rorobaani bidingo janapatengon, da·alo Meghalaya a·dokba namroro silrorona man·e a·songo niksengbatsranggipa a·dokrangoni damsa ong·paengaha ine Deputy Commissioner aganaha.
Ia salko manianio, West Garo Hills a·jani Deputy Commissioner Vibhor Aggarwal-ni jakchi dingtang dingtang award-rangkoba on·angaha aro susaanirango chegipa chatro chatrirangnaba boksisrangko on·angaha.
Chang 54-gipa Meghalaya Day-ko North Garo Hills a·jaoba, Resubelpara-ni Mini Secretariat-o maniangaha aro ia manianio, a·dokni Tourism Minister Timothy D Shira, mongsonggipa sokgipa ong·e bak ra·angaha. Ia tom·bimonganiko ong·atanio, Kharkutta MLA Rupert Momin, North Garo Hills a·jani Deputy Commissioner Dr Abhishek Saini, dingtang dingtang official-rang aro dingtang dingtang dolni dilgiparangba bak ra·angtokaha.
Ia salko manianio, a·dokni Tourism Minister, tom·anio bak ra·giparangna aganprakangengon, Meghalaya a·dokko man·na gita krengdilanggipa pagitchamrangni gimin janapangenba, a·dokni skanggipa Chief Minister Capt Williamson A Sangma, BB Lyngdoh, Stanley Nichols Roy aro gipin dilgiparangni All Party Hill Leaders Conference (APHLC)-o bakrime kamrangko ka·ani a·selsa Meghalaya a·dokna krengani chu·sokgipa ong·aha ine parakangaha.
Ia salko manianio, North Garo Hills a·jana mikkim rasongko ra·bagipa dingtang dingtang manderangna award-rangkoba on·angaha aro award-ko man·gipa manderangara, Taitus Ch Marak, Rev Omed W Momin aro Rev Ramke W Momin-ni ma·drangrang aro gipinrang ong·a.
Apsan daken, Dadenggre-oba chang 54-gipa Meghalaya Day-ko Dadenggre Multi-Facility Centre-o maniangaha aro ia program-ko Dadenggre Civil Sub-Division ong·ataha. Ia program-ko Dadenggre-ni Supply Inspector Salchra Sangma dilangaha aro rimchaksoani kattarangko, Dadenggre-ni Assistant Commissioner Raj Kumar Hajong aganangskaaha.
Ia tom·anio, Dadenggre C&RD Block-ni BDO Saljagring Momin, Meghalaya a·dokko man·ani bidingo jinmana agan-talatanirangko on·angaha.
Ia tom·anio, Dadenggre-ni Civil SDO Richa Kulkarni, mongsonggipa sokgipa ong·e bak ra·angaha.
